Bıyl 300-den astam atyraýlyq shetelge jumys isteýge barady

<p>ATYRAÝ. KAZINFORM &mdash; Bıyl Atyraý oblysynyń 300-den astam turǵynyn alys jáne jaqyn shetelge jumys isteýge jiberý kózdelip otyr. Onyń deni munaı-gaz salasyndaǵy jobalarda jumys isteıdi.</p>

Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetinshe, 16 myń jumyssyz tirkelgen. Onyń ishinde 6 myń adam jergilikti munaı kompanııalarynan jumystan bosaǵan. 

Basqarmanyń bólim basshysy Gúlbolat Amanǵalıevanyń aıtýynsha, bıyl shetelden 250 mamanǵa suranys túsken. Onyń ishinde Reseıdiń Amýr ólkesindegi munaı komapnııasy 69 mamandy jumysqa tartqaly otyr. 

Atyraýda otandyq jumysshylardy shetelderge daıyndaıtyn kompanııa menedjeri Oljas Sultanovtyń aıtýynsha, byltyr halyqaralyq jobalarǵa qatysý úshin 250 myń adam ótinish bergen. Onyń ishinde 200 maman halyqaralyq jobalarda jumys isteýge jiberilipti. Bes maman Katarda áli jumys istep júr. Endi jergilikti mamandardan jańa top jasaqtalyp jatyr. Kompanııa olardy mamandyǵyna baılanysty iriktep, qujattaryn toltyrýǵa kómektesedi.

«Qazir 80 adamdy Katarda jumys isteýge jiberýge daıyndap jatyrmyz. Eki eldiń arasyndaǵy áriptestiktiń nátıjesinde qazaqstandyq jumysshylarǵa arnalǵan jeńildikter bar. Bul qazaqstandyq mamandarǵa eńbek naryǵynyń jańa keńistigin ashty», -deıdi Oljas Sultanov. 

Máselen, Nursultan Aryqbaev Reseı Federatsııasynyń Kalınıngrad oblysynda 8 aı jumys istep kelgen. Onyń mamandyǵy — tehnıkalyq qaýipsizdik ınjeneri. Endi ol Katar elinde jumys isteý úshin qujat tapsyrǵan.

Eske sala ketelik, buǵan deıin bıyl Atyraý oblysyna jumys isteýge 4 765 sheteldik keletinin jazǵan bolatynbyz.