Bıyl 3 aıda Kishi Aralǵa 1 mlrd 200 mln tekshe metr sý quıyldy
«Keıingi 12 jylda Kishi Aral teńizindegi sý kólemi 8,5 mlrd tekshe metrge deıin azaıyp ketti. Óıtkeni, sý joǵarydan az kelýde. Osydan 12 jyl buryn bizde 27 mlrd tekshe metr sý bar edi. Qazirgi tańda 18 mlrd tekshe metrden asady.
Jazda sý tapshy, al qysta kóp bolǵanymen Aralǵa jetpeı jatyr. Bıyl qańtar, aqpan, naýryz aılarynda sý shynymen kóp boldy. Sondyqan sýdy múmkindiginshe kóp alýǵa tyrystyq. Nátıjesinde Aralǵa aldyńǵy jyldardaǵy 1 jyldyq normany 3 aıdyń ishinde jiberdik. 1 mlrd 200 mln tekshe metr sý Aralǵa bardy. Aldaǵy ýaqytta da osy baǵytta jumys isteımiz. Qolǵa alyp jatyrmyz», — dedi Nurlybek Nálibaev.
Onyń atap ótýinshe, ótken jyly Memleket basshysynyń tapsyrmasymen Senattyń vıtse-spıkeri bastaǵan senatorlar óńirde bolyp, Araldyń jaǵdaımen tanysty. Kókaral bógetin qaıta jańǵyrtýǵa, kúrdeli jóndeý ótkizýge 4,5 mlrd teńge bólýge sebepker boldy. Bógetti jóndeý jumysy 2024 jyly aıaqtalady.
«Óńirdegi 21 kanaldy jóndeý jumystary júrip jatyr. Prezıdent tapsyrmasyna sáıkes, Úkimet rezervinen 3 mlrd 600 mln teńge qarajat bóldi. Sol qarajatqa kanaldarymyzdy tazaladyq. Eski sý qurylystaryn kúrdeli jóndeýden ótkizip, qalpyna keltirdik. 137 sý sorǵysyn satyp aldyq. Sý tapshy kezde kúrishke osy sorǵylardyń kómegimen sý jetkizetin bolamyz. Qazirgi ýaqytta 21 kanaldyń 95 paıyzy jóndeldi. Ary qaraı da jumys istelip jatyr. Jyldyń sońyna deıin aıaqtaımyz», — dedi ol.