Bıyl 2487 mektep profılaktıkalyq baqylaýda bolady – QR Oqý aǵartý mınıstrligi

<p>ASTANA. KAZINFORM -<strong> </strong>Qazaqstandyq 2,5 myńǵa jýyq mektepte bilim berý qyzmetiniń sapasyn qamtamasyz etý boıynsha tekserý júrgiziledi, dep habarlaıdy QR Oqý-aǵartý mınıstrliginiń baspasóz qyzmeti.</p>

Baspasóz qyzmetiniń málimetterine qaraǵanda, Oqý-aǵartý mınıstrliginiń Bilim salasynda sapany qamtamasyz etý komıteti bıylǵy jyldyń sońyna deıin profılaktıkalyq baqylaý júrgizý úshin 2487 bilim berý uıymyn anyqtady.

Jańa oqý jylynyń basynda bilim berý salasyndaǵy sapany qamtamasyz etý jónindegi aýmaqtyq departamentter 422 bilim berý uıymynda baqylaý-baǵalaý is-sharalaryn júrgizgen bolatyn. Іs-sharalar oqý úderisindegi problemalardy anyqtaýǵa, oqý protsesiniń memlekettik jalpy bilim berý standartynyń talaptaryna jáne biliktilik talaptaryna sáıkestigin anyqtaýǵa baǵyttaldy.

«Ótken jyly Komıtet pen onyń aýmaqtyq departamentteri 2624 bilim berý uıymynda túrli tekserýler júrgizdi, onyń ishinde memlekettik attestattaý, profılaktıkalyq baqylaý, shaǵymdar boıynsha jospardan tys tekserýler júrgizildi. Tekserý nátıjesinde muǵalimderdiń biliktiligin arttyrý kýrstarynyń ýaqtyly aıaqtalmaýy, mektepterdiń materıaldyq-tehnıkalyq bazasynyń talapqa saı qamtamasyz etilmeýi faktileri anyqtaldy», - dep atap ótti Bilim salasynda sapany qamtamasyz etý komıtetiniń tóraǵasy Ernur Dáýenov.

Atap ótý kerek, monıtorıng jáne baǵalaý qyzmeti bilim berý qyzmetiniń sapasyn, bilim berý úderisine qatysýshylardyń quqyqtary men qaýipsizdigin qorǵaýdy qamtamasyz etetin shara.