Bıyl 240 myń oqýshy men ata-anaǵa psıhologııalyq kómek kórsetildi

<p>ASTANA. KAZINFORM &mdash; Bıyl Psıhologııalyq qoldaý ortalyqtary 240 myńǵa jýyq oqýshy men olardyń ata-analaryna kómek kórsetti. Bul týraly QR Oqý-aǵartý vıtse-mınıstri Edil Ospan aıtty.</p>

 — Memleket basshysynyń tapsyrmasyna sáıkes elimizdiń barlyq óńirlerinde alǵash ret 20 Psıhologııalyq qoldaý ortalyǵy ashyldy. Mınıstrlik tarapynan ortalyqtardyń qyzmetin uıymdastyrý boıynsha ádistemelik usynymdar, shtat kestesi, qyzmetkerlerdiń biliktiligine jáne materıaldyq-tehnıkalyq jaraqtandyrýǵa qoıylatyn talaptar bekitildi. Qazirgi kúni ortalyqtardyń kadrmen qamtylýy 68% deńgeıinde, — dedi ol OKQ alańynda ótken dóńgelek ústelde.

Vıtse-mınıstrdiń aıtýynsha, bıyl Psıhologııalyq qoldaý ortalyqtary tarapynan 240 myńǵa jýyq oqýshy men olardyń otbasyna kómek kórsetilgen. Olardyń 140 myńy — kámeletke tolmaǵan bala, al 100 myńǵa jýyǵy — ata-ana.

 — Ortalyqtardyń qyzmetin damytý úshin jobalyq ofıs qurylyp, provaıderler anyqtaldy. Ortalyqtan tıisti baqylaý kúsheıtilýde. Barlyq ákimdikter belgilengen algorıtmge saı ortalyqtardyń jumysyn jolǵa qoıýdy qolǵa alýda. 2024-2025 oqý jylynyń basynan beri bilim uıymdaryna DOSBOLlike býllıngke qarsy otandyq baǵdarlama, balalar arasynda qaýipsiz minez-qulyq pen daǵdylardy damytýǵa baǵyttalǵan «qaýipsizdik sabaqtary» engizildi, — dedi Edil Ospan.

Buǵan deıin ınklıýzıvti bilim berýde psıhologııalyq-pedagogıkalyq qoldaýdyń úsh deńgeıli modeli engizilip jatqanyn jazǵan edik.