Bıyl 2300 adam jol apatynan qaza tapty: Úkimet qandaı shara qabyldap jatyr

<p>ASTANA. KAZINFORM &ndash; Eldegi aıyppuldar sany artty ma? Sońǵy jyldary osy salada qandaı zańdar ózgerdi? Bul týraly QR Іshki ister mınıstrligi Ákimshilik polıtsııa komıtetiniń resmı ókili Aqtoty Boranova aıtyp berdi.</p>

Eń aldymen spıker elimizde aıyppuldar sany óspegenine basa toqtaldy.

− QR Ákimshilik quqyqbuzýshylyqtar kodeksinde jaýapkershilik AEK kólemimen kórsetiledi. AEK-pen baılanystyrǵasyn, aıyppul kólemi artqandaı kórinýi múmkin. Al bizdiń tarapymyzdan aıyppuldy ósirý týraly eshqandaı ózgeris bolǵan joq. Bul jerde qozǵalystyń qaýipsizdigine, joldaǵy apatty azaıtýǵa, jol-kólik oqıǵalarynyń aldyn alýǵa baǵyttalǵan sharalar nátıjesinde ózgerister men usynystar engizilýi múmkin, - dedi A.Boranova.

Mamannyń aıtýynsha, sońǵy jyldary avtokólikti masań kúıde basqarǵan júrgizýshilerge jaýapkershilik kúsheıdi – buryn 3 jyl bolsa, qazir 7 jylǵa júrgizýshi kýáliginen aıyrylyp, ózi ákimshilik qamaýǵa alynady.

− Buryn júrgizýshi kýáligin múldem almaǵan adamdar masań kúıde kólik aıdasa, tek qana 15 táýlikke qamaýǵa alynatyn. Keıin esh kedergisiz júrgizýshi kýáligin alatyn. Al kýáligi bar adamdar – qujatynan aıyrylatyn. Mundaǵy ádiletsizdik joıyldy. Endi júrgizýshi kýáligin múldem almaǵan adam masań kúıde kólik rólinde ustalsa, aldaǵy ýaqyttaǵy 7 jylǵa kýálik alýǵa shekteý qoıylady, - dep túsindirdi ol.

Sondaı-aq, elimizdiń Ákimshilik quqyqbuzýshylyqtar kodeksinde avtokólikti belgilengen jyldamdyqtan asyra basqarýǵa shekteý qoıyldy.

− Taldaýǵa súıensek, bıylǵy 11 aıda jol apatynan 2300-den astam adam qaza tapty. Bul - qurbandardyń 60 paıyzy, shamamen 1200 adam qala syrtyndaǵy joldarda apatqa ushyraǵan. Osyny taldaı kele, qala syrtynda bolatyn jol apattarynyń basty sebebi – jyldamdyqty asyrý, qarsy baǵytqa shyǵyp ketý, manevr jasaýdaǵy qatelikter ekenin bildik. Eń birinshi kezekte júrgizýshilerdiń kólik júrgizý mádenıeti tur. Biz qoǵam bolyp, júrgizýshi, mınıstrlik, úkimet bolyp bul máseleni sheshýge kirispesek, esh nátıje bolmaıdy, ıaǵnı birjaqty atqarylatyn jumystardyń nátıjesi tómen bolady. Ár adam ózinen bastaýy kerek. Nege adam óz ómirine birinshi kezekte jaýap bermeske? Odan keıin Úkimettiń tarapynan istelip jatqan erejelerdi nege qabyldamasqa? - deıdi QR ІІM ókili.

Sondaı-aq, qazir aıyppuldan túsken qarajattyń barlyǵy jergilikti atqarýshy organnyń bıýdjetine túsedi. Jolda júrý týraly zańnyń 17-babyna sáıkes, jergilikti atqarýshy organdar bul qarajatty jolda júrý qaýipsizdigin qamtamasyz etýge baǵyttalǵan is-sharalarǵa – baǵdarshamdar qoıý, jol belgilerin salý, avtomatty tirkeý júıeleri sekildi kerek-jaraqtarǵa jumsaıdy.

Eske sala ketsek, 4 jeltoqsanda jol qaýipsizdigin arttyrýǵa jáne jol-kólik oqıǵalarynyń sanyn azaıtýǵa baǵyttalǵan zań kúshine endi. Endi kameralar ortasha jyldamdyqty tirkeıdi.