Bıyl 217 mektep oqýshylardy qabyldaıdy

<p>ASTANA. KAZINFORM &ndash; Osy jyldyń sońyna deıin 217 mekteptiń qurylysy aıaqtalady. Bul týraly Májilistiń jalpy otyrysynda Úkimettiń 2023 jylǵy respýblıkalyq bıýdjettiń atqarylýy týraly esebin tanystyrǵan Qarjy mınıstri Mádı Tákıev aıtty.</p>

«2022 jyldan bastap Úkimet jobalyq basqarýdyń belgilengen ólshemsharttaryna sáıkes keletin ulttyq jobalardyń jańartylǵan tizbesin aıqyndaý boıynsha jumys júrgizdi. Bıýdjettiń múmkindikteri men basymdyqtaryn eskere otyryp, 3 ulttyq joba qabyldandy. Olardy iske asyrýǵa túrli kózderden 625,2 mlrd teńge, onyń ishinde respýblıkalyq bıýdjetten 536,4 mlrd teńge bólindi. Qalǵan 10 ulttyq joba men 2 memlekettik baǵdarlamanyń kúshi joıyldy», - dedi mınıstr.

Onyń aıtýynsha, «Jaıly mektep» pılottyq ulttyq jobasyn iske asyrýǵa óńirlerge Ulttyq qor qarajaty esebinen 500 mlrd teńge bólindi.

«Ulttyq jobada 4 strategııalyq kórsetkishke qol jetkizý, onyń ishinde keminde 740 myń jańa oqýshy oryndaryn iske qosý kózdeledi. Osy jyly 217 mekteptiń qurylysy aıaqtalady», - dedi ol.

Mádı Tákıev «Aýylda densaýlyq saqtaýdy jańǵyrtý» pılottyq ulttyq jobasyn iske asyrýǵa josparlanǵan 42 mlrd teńgeniń 37,8 mlrd teńgesi bólingenin aıtady.

«2023 jyly medıtsınalyq-sanıtarııalyq kómek pýnktteriniń 99 obektisin salý josparlanǵan. Onyń ishinde 93 obekti aıaqtaldy, 3 obektiniń qurylysy jalǵasýda, 4 obektiniń qurylysy toqtatyldy. «Qoljetimdi ınternet» ulttyq jobasyn iske asyrýǵa josparlanǵan 87,8 mlrd teńgeniń 87,4 mlrd teńgesi ıgerildi. Josparlanǵan barlyq kórsetkishterge qol jetkizildi», - dedi mınıstr.