Bıyl 186 myń túlek mekteppen qoshtasady

<p>ASTANA. KAZINFORM &ndash; Bıylǵy oqý jylyn 4 mln-ǵa jýyq oqýshy aıaqtaıdy. Al,186 myń túlek mekteppen qoshtasyp, jańa ómirge qadam basady.&nbsp;</p>

Oqý-aǵartý mınıstrliginiń málimetinshe, shamamen 3,9 mln oqýshy 2023-2024 oqý jylyn bitirse, onyń ishinde 186 myń túlek mekteppen qoshtasady.

Bıyl uzaqtyǵy 34 apta bolǵan oqý jyly 25 mamyrda aıaqtalady. 

24 mamyr kúni elimizdiń barlyq mektepterinde 1-10 synyp oqýshylary úshin «Bilimim – Otanyma!» taqyrybynda biryńǵaı synyp saǵaty ótedi. Munda synyp jetekshileri bilim alýshylarmen birge oqý jylyn qorytyndylaıdy.

186 myń 11-synypty bitirýshi úshin sońǵy qońyraý 25 mamyr kúni «Mektebim, saǵan myń alǵys!» taqyrybynda ótedi.

Sondaı-aq emtıhandardy ótkizý ýaqyty belgili boldy. 5-8, 10 synyp oqýshylary úshin emtıhandar 27 mamyrda bastalady. 9 synyp oqýshylarynyń emtıhandary 29 mamyrdan 10 maýsymǵa deıin jalǵasady. 11 synyptar úshin qorytyndy emtıhandar 28 mamyr-11 maýsym aralyǵyna josparlanǵan. Attestattardy saltanatty tapsyrý 12-15 maýsym aralyǵynda ótedi. Bul rette aıta ketý kerek, tótenshe jaǵdaı jarııalanǵan óńirlerde oqýshylar aralyq jáne qorytyndy emtıhandardan bosatyldy. Olar: Aqtóbe oblysynda 9 mektep, Atyraý oblysynda 3 mektep jáne Soltústik Qazaqstan oblysynda 5 mektep.

156 myń tehnıkalyq jáne kásiptik bilim berý uıymdaryn bitirýshiler úshin qorytyndy attestattaý 28 maýsymǵa deıin júrgiziledi, al dıplom tapsyrý rásimi 28 maýsym men 1 shilde aralyǵynda ótedi.