Bıyl 10 myńnan astam kredıttik turǵyn úı paıdalanýǵa beriledi

<p>ASTANA. KAZINFORM &mdash; Bıyl turǵyn úı qurylysyn yntalandyrýǵa shamamen 965 mlrd teńge qarajat bólý josparlanǵan. Bul týraly Ónerkásip jáne qurylys mınıstri Qanat Sharlapaev málim etti.</p>

— Salaǵa ınvestıtsııany qarqyndy tartý úshin Úkimet turǵyn úı qurylysyn yntalandyrý boıynsha birqatar shara qabyldady. Bıyl bul maqsatqa shamamen 965 mlrd teńge qarajat josparlanǵan. Bul 160 000 astam azamatty 41 000 jańa baspanamen qamtýǵa múmkindik beredi. Sonymen qatar, osal toptarǵa qol jetimdi quraldardy usynýǵa erekshe kóńil bólinip jatyr. Bıyl memlekettik qarajat esebinen 22 myńnan astam jaldamaly páter satyp alý úshin, 336 mıllıardqa jýyq teńge qarastyryldy, — dedi Qanat Sharlapaev Úkimet otyrysynda. 

Mınıstrdiń málimdeýinshe, jyl sońyna deıin 165 mlrd teńgege memlekettik baǵaly qaǵazdar shyǵarý arqyly 10 000 astam kredıttik turǵyn úıdi paıdalanýǵa berý josparlanǵan. 

— Búgingi kúni, atalǵan páterler boıynsha 2-5% jeńildetilgen ıpotekalyq nesıe arqyly 7861 nesıe berilgen. Turǵylyqty aýdandaryna ınjenerlik jelilerdi tartýǵa 83 mlrd teńge bólindi. Onyń ishinde 34 mlrd teńgesi, 21,2 myńnan astam jer telimin ınfraqurylymmen qamtamasyz etedi. Bıyl mamyrdan bastap, «Naýryz» jańa turǵyn úı baǵdarlamasy iske qosyldy. Onyń aıasynda osy jyly 300 mlrd teńgege 12 000 ıpotekalyq nesıe berý josparlanýda. Qazir shamamen 172,4 mlrd teńgege 6628 nesıe berildi, — deıdi ol.

Buǵan deıin 50 myń qazaqstandyq jalǵa berilgen úıdi jekeshelendiretini týraly habarlaǵan edik.