Bıyl 1 mln adamdy jumysqa ornalastyrý kerek: jospar qalaı oryndaldy

<p>ASTANA. KAZINFORM &ndash; QR Eńbek jáne halyqty áleýmettik qorǵaý mınıstriligi bıyl shamamen 1 mln adamdy jumysqa ornalastyrý mindeti qanshalyqty oryndalyp jatqany jaıynda túsinik berdi.</p>

«Ortalyq jáne jergilikti atqarýshy organdardyń negizgi mindetteriniń biri - jańa jumys oryndaryn qurý. Qazir jumys oryndaryn qurý negizinen salalyq tujyrymdamalar, Óńirlerdi damytý josparlary, ınvestıtsııalyq jobalar, shaǵyn jáne orta kásipkerlikti damytýdy yntalandyrý jónindegi baǵdarlamalar aıasynda iske asyrylatyn jobalar arqyly qurylady. Bıyl bekitilgen óńirlik jumyspen qamtý kartalary sheńberinde 948 myń adamdy jumysqa ornalastyrý josparlandy. Osy ýaqytqa deıin 735 myń adam jumysqa ornalastyryldy», - delingen Eńbek mınıstrliginiń Kazinform agenttigine bergen jaýabynda.

Onyń ishinde tujyrymdamalar men ulttyq jobalar aıasynda 51 myń adam, jumyspen qamtýdyń belsendi sharalary kómegimen 189 myń adam, turaqty jumys oryndaryna 270 myń adam, shaǵyn jáne orta bıznes kásiporyndaryna 225 myń adam jumysqa ornalastyryldy.

«Alǵa qoıylǵan mindet jyl sońyna deıin oryndalady dep josparlanǵan», - dep atalyp ótken vedomstvo aqparatynda.

Jaqynda QR Premer-Mınıstriniń orynbasary Tamara Dúısenova jumyssyzdar qataryna kimder jatatynyn túsindirgen edi. 

Budan buryn habarlanǵandaı, QR Parlamenti Májilisi tóraǵasynyń orynbasary Danııa Espaevanyń aıtýynsha, tehnıkalyq jáne kásiptik bilim berýdi reformalaý arqyly jumysshy kásipterdiń bedelin arttyrý qajet. Sebebi qazirgi kezde kásiptik-tehnıkalyq bilimi bar mamandyqtarǵa degen suranys joǵary bilimdi túlekterge degen qajettilikten 70 paıyzǵa artyq.