Bıiktigi 1,5 metr: Qıǵash ózeniniń saǵasynda lotos gúldedi

ATYRAÝ. QazAqparat – Atyraý oblysynda Qıǵash ózeniniń saǵasynda qyzǵylt tústi lotos gúli gúldedi, dep habarlaıdy QazAqparat tilshisi.

Qıǵash ózeni Atyraý oblysynyń Qurmanǵazy aýdany men Reseıdiń Astrahan óńiriniń shekarasynda aǵyp jatyr. Ózen saǵasynda lotos gúldeıtin aýmaq bar.

Qıǵash ózenine «Aqtóbe – Atyraý – Reseı shekarasy» baǵytyndaǵy jolmen ǵana jetýge bolady. Araqashyqtyq – 300 shaqyrymǵa jýyq.

«Ózen saǵasyndaǵy lotos ósken alqapqa qaıyqsyz jetý múmkin emes. Gúldiń hosh ıisi murnyńdy jarady. Sý betinde gúldep turǵan lotostyń ádemiligin tek kózben kórý kerek», - deıdi sırek kezdesetin gúl alqabyna barǵan Samat Amanáliuly.

Qıǵash ózeniniń saǵasynda ǵana gúldeıtin lotostyń túsi – qyzǵylt, bıiktigi 150 santımetrge deıin jetedi. Qazir 5 myń gektarǵa jýyq aýmaqta jaıqalyp gúldep tur.

Sý ortasynda ósetin lotos tańerteń qaýyzyn ashyp, keshke qaıta jabady. Tańerteń sý betinde qaýyzyn ashqanda qurǵaq bolyp turady.

Bul gúldi úndister men vetnamdyqtar tazalyqtyń sımvoly retinde baǵalaıdy. Tipti onyń emdik qasıeti bar depesepteledi. Tuqymyndaǵy aqýyz búırek pen kókbaýyr, júrek aýrýy men uıqysyzdyqty emdeýge qoldanylady.

Alaıda, lotos gúlin julýǵa bolmaıdy. Sebebi ol elimizdegi sırek kezdesetin ósimdikterdiń tizimine engizilgen.

Vıdeodan alynǵan kadr