Bıdaı ımportyn shekteý reseılik astyqtan ishki naryqty qorǵaý maqsatynda engizildi - AShM

<p>Elimiz osy jyldyń 8 aıynda Reseıden 2,9 mln tonna astyq ımporttady. Bul jaıynda Aýyl sharýashylyǵy mınıstrliginen málim etti, dep habarlaıdy Kazinform.&nbsp;</p>

«Ulttyq statıstka bıýrosynyń málimetine sáıkes, osy jyldyń qańtar-tamyz aılary aralyǵynda Reseı Federatsııasynan ákelingen bıdaı kólemi 2,9 mln tonnany qurady», - delingen mınıstrliktiń agenttiktiń resmı saýalyna bergen jaýabynda.

Vedomstvonyń atap ótýinshe, kórshi elden keletin astyq ımportyn tejeý úshin 10 sáýirden bastap avtokólikpen bıdaı ákelýge tyıym salyndy. Ol qazaqstandyq astyq naryǵynyń birshama qalypqa kelýine yqpalyn tıgizdi. Bul nátıjeni ári qaraı ilgeriletý úshin 6 qyrkúıekten bastap reseılik astyqty temir jolmen ákelýge de shekteý engizildi.

«Jalpy astyq ımporttyn shekteý salyqtar, bajdar jáne alymdar tólenbeı zańsyz joldarmen elimizge ákelinetin, jáne qazaqstandyq astyq retinde reeksporttalatyn reseılik astyqtan ishki naryqty qorǵaý maqsatynda engizilip otyr. Kórsetilgen zańsyz ımport pen reeksport qazaqstandyq astyqtyń ishki jáne syrtqy naryqtardaǵy ótkizý naryqtaryn tartyp alyp, qazaqstandyq astyq óndirýshilerdiń ádil tabys tabýyna kedergi jasap turǵan», - dedi mınıstrlikten.