Bıdaı eksporty boıynsha Iranmen kelisimge qol qoıylady

ASTANA. QazAqparat - Bıyl aqpanda Qazaqstan men Reseı bıdaı jetkizý boıynsha Iranmen kelisimge qol qoıady. Bul týraly Senattaǵy Úkimet saǵatynan keıin tilshilerge QR Aýyl sharýashylyǵy vıtse-mınıstri Gúlmıra Isaeva málim etti, dep habarlaıdy QazAqparat.

Onyń sózine qaraǵanda, bul kelisim úshinshi elderge birlesken ónim eksportyna da baǵyttalyp otyr.

«Qol qoıylǵan kelisimniń (erkin saýda aımaǵy týraly) ajyramas bóligi bolatyn tıisti qujat daıyndalatyndyǵy týraly sheshim qabyldandy. Oǵan Qazaqstan, Reseı jáne Iran qatysady. Bul kelisim daıyndaldy. Oǵan resmı qol qoıý rásimi 12 aqpanda Máskeýde ótpek», - dedi G. Isaeva.

Atalǵan kelisim kóp jyldarǵa arnalǵanyna toqtalǵan ol, «eger de taraptardyń biri qujatty qaıta qarastyrǵysy kelse, onda tıisti sharalar qabyldanady», - dedi.

Vıtse-mınıstrdiń aıtýynsha, sońǵy úsh jylda Iran astyq ımportyna shekteý engizgen, sebebi bul el ózin tolyqtaı qamtamasyz ete alady. Búginde 12 mln tonna ónim óndirip keledi. Degenmen de atalǵan kelisim birlese úshinshi naryqtarǵa shyǵýǵa jol ashady.

«Iran mańynda ornalasqan elder álemdegi barsha astyq pen un eksportynyń 70 paıyzyn tutynady. Sáıkesinshe, Qazaqstannyń jáne Reseıdiń bıdaıymen eksportqa birlese shyǵýdyń biregeı múmkindigi bar», - dedi Gúlmıra Isaeva.