Bıdaı eksporttaıtyn 30 eldiń arasynda Qazaqstan ǵana teńizge shyǵa almaıdy – mınıstr

ASTANA. QazAqparat – Astana halyqaralyq forýmyna qatysqan Aýyl sharýashylyǵy mınıstri Erbol Qarashókeev Agroónerkásip keshenin damytý tujyrymdamasynyń basym baǵyttaryn atady, dep habarlaıdy QazAqparat tilshisi.

«Agroónerkásip keshenin damytý tujyrymdamasynyń basty maqsaty – eksport kólemin 2 ese arttyrý. Keıingi eki jyl qatarynan bul baǵytta ósim bar. Máselen, bıdaı tóńiregindegi problemaǵa erekshe toqtalaıyn. Álemde bıdaı eksporttaıtyn 30 el bar. Bul rette men qyzyq derek keltirgim keledi – osy 30 memlekettiń ishinde Qazaqstan teńizge shyǵa almaıtyn jalǵyz el. Sondyqtan biz eksport kólemin birden kóteremiz dep aıta almaımyn. Sebebi ózge álem elderiniń bıdaıdy teńiz arqyly tasymaldaý múmkindigi bar. Ony da eskerý oryndy dep sanaımyn», - dedi Erbol Qarashókeev.

Mınıstrdiń sózinshe, teńiz arqyly eksporttalatyn bıdaıdyń quny arzan. Al kólik nemese temirjolmen tasymaldanǵan taýardyń baǵasy shyǵynnyń kóp bolýyna baılanysty áldeqaıda qymbatqa túsedi.

Erbol Qarashókeev búgingi forým barysynda atap ótkendeı, byltyr aýyl sharýashylyǵy salasynyń negizgi kapıtalyna 2 mlrd dollar ınvestıtsııa tartylǵan. Sondaı-aq, azyq-túlik taýarlarynyń óndirisi 4% artyp, 6,5 mlrd dollarǵa jetti.