Bıbisara Asaýbaeva «Qazaqstannyń eńbek sińirgen sport sheberi» atandy

ASTANA. QazAqparat – Shahmattyń blıts túrinen eki dúrkin álem chempıony Bıbisara Asaýbaeva «QR Eńbek sińirgen sport sheberi» ataǵyn aldy. Bul týraly QazAqparat tilshisiniń saýalyna jaýap bergen shahmatshynyń anasy Lıana Tańjaryqova málim etti.

«Bıbisara shahmattan «QR Eńbek sińirgen sport sheberi» atandy. Oǵan bul ataqty búgin Mádenıet jáne sport mınıstri Ashat Oralov tabystady. Aıta keteıik, sońǵy 30 jylda elimiz boıynsha shahmattan eńbek sińirgen sport sheberi ataǵyn eshkim almaǵan», - dep málimdedi Lıana Tańjaryqova tilshi saýalyna jaýap bere otyryp.

Qosa ketsek, Bıbisara Asaýbaeva - Taraz qalasynyń týmasy.

Ol búginge deıin áıelder arasyndaǵy halyqaralyq grossmeıster, erler arasyndaǵy halyqaralyq sheber ataǵyn alǵan.

2021-2022 jyldary qatarynan eki ret álem chempıony atanyp, álemniń eń úzdik jas shahmatshysy ataǵyna laıyqty dep tanyldy.

Buǵan qosa, Bıbisara 2021 jyly shahmattyń rapıd túrinen álem chempıoantynyń kúmis júldegeri, Azııa chempıony bolǵan.