Bıbisara Asaýbaeva áıgili grossmeıster Sergeı Karıakındi qalaı jeńgenin aıtty

ASTANA. QazAqparat – Qazaqstandyq shahmatshy, blıtsten eki dúrkin álem chempıony Bıbisara Asaýbaeva áıgili reseılik grossmeıster Sergeı Karıakınmen ótken sensatsııalyq oıyny týraly aıtyp berdi, dep habarlaıdy QazAqparat tilshisi.

«Bul myqty týrnır boldy. Meni oıynǵa sońǵy sátte shaqyrdy, ókinishke qaraı daıyndyqqa ýaqyt az boldy. Týrnırde áıelder arasyndaǵy úzdik shahmatshylar ǵana emes, Sergeı Korıakın, Teımýr Radjabov, Aleksandr Grışýk sekildi álemniń eń myqty shahmatshylary da oınady.

Rapıdte óte jaqsy oıyn kórsetip 4 upaımen Sergeı Korıakındi jeńip, odan bólek Teımýr Radjabov jáne taǵy birneshe myqty shahmatshydan basym tústim. Oıyn nátıjesine 4 degen baǵa berdim. Sebebi ókinishke qaraı, blıtsten sońǵy oıyn kúni Sergeı Korıakınmen teń tússem de, az upaı aldym. Kóp olqylyqqa jol berdim, sodan týrnırlerge aldyn ala tyńǵylyqty daıyndalý kerek degen uıǵarymǵa keldim», - dedi Bıbisara Asaýbaeva Jibek Joly telearnasyna bergen suhbatynda.

Sonymen qatar ol halyqaralyq shahmat týrnırindegi qarsylasynyń oıynyna pikir bildirdi.

«Maǵan jeńis buıyrdy. Men kásibı shahmatshy bolǵandyqtan, oıyn barysynda Sergeı Korıakınniń qalaǵany bolmaıtynyn túsindim jáne ol sát meniń jeńiske jetýime jol ashty. Desek te ol óte myqty qorǵaýshy jáne álemdegi úzdik shahmatshylardyń biri. Sondyqtan jeńisti jiberip almaý úshin partııa sońyna deıin kúrestim», - deıdi shahmattan blıts boıynsha eki dúrkin álem chempıony.

Buǵan deıin B. Asaýbaeva Memleket basshysy Qasym-Jomart Toqaevpen kezdesýinen keıingi áserimen bólisken edi.

Sondaı-aq shahmatshy aldaǵy jarystarǵa qatysty josparymen bólisti.