Bıbisara Asaýbaeva aldaǵy jarystar týraly: Úzdik oıyn mánerin kórsetemin

ASTANA. QazAqparat - Blıts-shahmattan álem chempıony Bıbisara Asaýbaeva Jibek Joly telearnasyna bergen suhbatynda aldaǵy týrnırler týraly aıtyp, shahmatshylarǵa keńesin de berdi, dep habarlaıdy QazAqparat tilshisi.

«Bıyl klassıkalyq shahmattan áıelder arasynda birneshe týrnır ótedi. Osy oraıda eń úzdik oıyn mánerin kórsetýdi maqsat etip otyrmyn», – dedi Bıbisara Asaýbaeva efır kezinde.

Sondaı-aq jas chempıon shahmattan Qazaqstan quramasyn álemdegi eń myqty komandalar qatarynan kórgisi keletinin aıtty.

«Menińshe, balalar jetistikti kórgende, motıvatsııa ala túsedi. Kishkentaı kezimde eń myqty shahmatshylardyń oıynyna qarap, solardaı bolýdy, ásirese ol sizdiń otandasyńyz bolsa, solardaı bıikke jetýdi armandaıtynmyn. Menińshe, bul serpin beredi. Bizde jetkinshekter arasynda myqty shahmatshy qyzdar kóp. Uldar jaǵy da tartylyp, álemdegi eń myqty quramalardyń biri bolamyz degen úmittemin», - deıdi ol.

Odan bólek, Bıbisara Asaýbaeva jas shahmatshylarǵa óz keńesin berdi.

«Kóp jumys istep, ózine sene bilý kerek. Saǵan senetin jáne qoldaıtyn jandar janyńnan tabylsa, tipti jaqsy. Bul oraıda men baqyttymyn. Meniń jaqyndarym únemi qasymda. Ásirese jaqyn adamdardyń qoldaýy jeńilistiń dámin tatqanda óte mańyzdy. Olar qasyńda bolady. Eń bastysy, bastaǵan isti jolda qaldyrmaı, jumys isteýdi jalǵastyrý kerek», - degen oıymen bólisti álem chempıony.

Buǵan deıin B.Asaýbaeva Memleket basshysy Qasym-Jomart Toqaevpen kezdesýinen keıingi áserimen bólisken edi.

Foto: facebook.com/kazchesskz