Bıbigúl Jeksenbaı azamattyq qorǵanys salasyna qatysty usynys aıtty

ASTANA. QazAqparat - Senator Bıbigúl Jeksenbaı elimizdiń Premer-Mınıstri Álıhan Smaıylovtyń atyna joldaǵan depýtattyq saýalynda órt sóndirýshilerdiń problemalary týraly jarııa etti. Azamattyq qorǵanys júıesinde órt sóndirý bólimderi jetispeıdi, sonymen qatar olardyń shtattary da tolyq emes, dep habarlaıdy QazAqparat tilshisi.

Senator azamattyq qorǵaý salasyndaǵy mamandardy oqytý men daıarlaý jaǵdaıyna da toqtaldy. Elimizde bolashaq qutqarýshylardy oqytatyn jalǵyz ǵana joǵary oqý bar. Ol – Málik Ǵabdýllın atyndaǵy Azamattyq qorǵaý akademııasy.

Alaıda depýtat Akademııa Tótenshe jaǵdaı mınıstrligi men onyń mekemelerin kadrlarǵa degen suranysyn tolyq qamtamasyz etetinine kúmán keltirdi. Joǵary oqý ornynyń materıaldyq-tehnıkalyq jabdyqtalý jaǵdaıy da nashar.

«Senat komıtetiniń músheleri bıylǵy naýryz aıynda Akademııaǵa baryp, oqý úderisiniń damýy týraly aıtý múmkin emestigine kóz jetkizdi. Óıtkeni kýrsanttardyń turýy men tamaqtanýynyń qarapaıym jaǵdaıy jasalmaǵan. Olar osy jyldyń aqpan aıynan bastap praktıkalyq sabaqtarǵa aralasa almaı, qashyqtan oqýǵa májbúr bolǵan. Bul olardyń jaýyngerlik daıarlyǵy men oqýyndaǵy eleýli kemshilik bolyp otyr», - dedi Bıbigúl Jeksenbaı.

Depýtat saýal barysynda oqytýshylar quramynyń problemalaryna da toqtaldy. Senator keıingi ýaqytta oqytýshylar quramynyń jalaqysy tómen bolýyna oraı Akademııadan kadrlardyń ketip jatqanyn aıtty. Bıyl jalaqysy ósken Tótenshe jaǵdaılar mınıstrligi qyzmetkerleriniń tizbesine Akademııa mamandary kirgen joq.

«Memleket basshysynyń Akademııanyń jańa keshenin salý jónindegi tapsyrmasyn ýaqtyly oryndaý úshin vedomstvoaralyq barlyq rásimderdi jedel júrgize otyryp, respýblıkalyq bıýdjetten qarjy bólýdi qamtamasyz etý qajet. Sondaı-aq qoldanystaǵy ǵımarattar men qurylystardy jóndeýge qarajat bólip, Akademııanyń professor-oqytýshylar quramy jalaqysyna qatysty máseleni qarastyrý kerek», - dedi ol.