«Bıbigúl» qazaq halyq aspaptar orkestri Qazan qalasynda óner kórsetti

<p>ASTANA. KAZINFORM — Bul mádenı shara Qazaqstan men Tatarstan halyqtary arasyndaǵy uzaq merzimdi baılanystardy nyǵaıtýǵa, ortaq rýhanı murany saqtaýǵa jáne dáripteýge baǵyttalǵan, dep habarlaıdy Abaı oblysy ákimdiginiń baspasóz qyzmeti.</p>

Abaı oblysynyń mádenı kúnderi aıasynda Ǵalıasqar Kamal atyndaǵy Tatar memlekettik akademııalyq teatrynda Qazaqstannyń eńbek sińirgen mádenıet qaıratkeri Nurlan Tókeıdiń jetekshiligimen Ámire Qashaýbaev atyndaǵy memlekettik fılarmonııasynyń «Bıbigúl» qazaq halyq aspaptar orkestriniń merekelik kontserti ótti.

Kontsertti Abaı oblysynyń ákimi Nurlan Uranhaev, Tatarstan Respýblıkasy Premer-mınıstriniń orynbasary Vasıl Shaıhrazıev, Qazaqstan Respýblıkasynyń Qazan qalasyndaǵy Bas konsýly Erlan Ysqaqov tamashalady.

Kontserttik baǵdarlama aıasynda Latıf Hamıdı, Ahmet Jubanov, Evgenıı Brýsılovskıı jáne Nurǵısa Tilendıev syndy tanymal kompozıtorlardyń shyǵarmalary oryndaldy. Orkestr «Abaı» operasynan arııalardy, sondaı-aq qazaq jáne tatar halqynyń mádenıetin beıneleıtin halyq bıleri men kompozıtsııalardy jurtshylyq nazaryna usyndy.

Foto: Abaı oblysynyń ákimdigi

Kórermender orkestrden bólek eki halyqtyń mádenı birligin aıshyqtaıtyn «Tumar» halyq bı ansambli bıshileriniń ónerin tamashalady. Kontserttik baǵdarlama aıasynda Qazaqstannyń eńbek sińirgen mádenıet qaıratkerleri Erlan Rysqalı men Maprýza Ýtýlenova, sondaı-aq elimizdiń Mádenıet salasynyń úzdigi atanǵan solıster kópshilikti ónerimen tánti etti.

Buǵan deıin habarlaǵanymyzdaı, Qazaq mýzyka óneriniń qarashańyraǵy — Qurmanǵazy orkestrine bıyl 90 jyl toldy.