Bıatlonnan álem chempıonatyna qatysýshylar Kóksheniń kórikti jerlerin aralady

BÝRABAI. QazAqparat - «Býrabaı damý» kásiporny Şýchınsk qalasynda ótip jatqan álem chempıonatynyń qatysýshylaryna arnap ulttyq parktiń kórikti jerlerine ekskýrsııa uıymdastyrdy, dep habarlaıdy QazAqparat.

Sulý Kóksheniń etegindegi bıatlon jarysyna álemniń 40 elinen sportshylar qatysyp jatyr.

Olar jarys kúnderi men jattyǵý arasynda Qazaqstannyń ásem tabıǵatyn aralaýǵa qýana kelisti.

Sheteldikterdi Býrabaıdyń kórikti tabıǵaty men qazaq halqynyń qonaqjaı peıili tańǵaldyrdy.

– Qazaqstanǵa kelemin dep eshqashan oılamaǵan edim. Bul el týraly biletinim de az bolatyn. Keremet el eken. Býrabaıdyń ormandary men kólderi Kanadaǵa qatty uqsaıdy. Tilimiz bólek bolǵandyqtan jergilikti adamdarmen qarym-qatynas jasaý qıyndaý, biraq soǵan qaramastan keremet áser aldym. Aldaǵy ýaqytta taǵy osynda jolym túsedi dep úmittenemin, – deıdi Vankýverden kelgen kanadalyq bıatlonshy Taıler Brınvýd.

Italııa quramasynyń múshesi Petro da Býrabaıdyń ózderi úshin erekshe mekenge aınalǵanyn aıtty.
– Osy chempıonattan ázirge 2 medal aldyq. 12 naýryzda jarys aıaqtalǵanǵa deıin taǵy da júlde alamyz degen úmitimiz bar. Jergilikti ásem tabıǵatty aralap, keremet áserge bólendik. Óte meıirimdi ári qonaqjaı adamdarmen tanystyq. Italııaǵa Qazaqstan týraly keremet esteliktermen qaıtatyn boldyq, – deıdi ol.