Bıatlon: Jekeleı saıystyń chempıondary anyqtaldy
Qazaqstan Bıatlonshylar odaǵynyń baspasóz qyzmeti málim etkendeı, básekeniń ekinshi kúni respýblıkalyq týrnır aıasynda jas bıatlonshylar jeke jarysta baq synady.
2009-2010 jyldary dúnıege kelgen jasóspirim uldar arasynda 6 km qashyqtyqta Shyǵys Qazaqstan oblysynyń týmasy Poltoranın Evgenıı kósh bastady. Ol barlyq mejege dál tıgizip, 0:16:53 ýaqytta márege jetti. Atý kezeńinde Dýdchenko Nıkıtanyń bir oǵy qıys ketip, 17 mınýt 15 sekýnd ishinde ekinshi bolyp jetse, onyń izinen Nemtsev Egor 17 mınýt 27 sekýndta jarysty aıaqtady.
Batys Qazaqstan oblysynan kelgen Aryn Tajıbaev 4,5 km qashyqtyqta 2011-2013 jyldary týǵan jasóspirim uldar arasynda eń úzdik atandy. Ol atý aımaǵynda esh múdirmesten 13 mınýt 39 sekýndta chempıon atandy. Denıs Chırvın atý kezinde bir ret qatelesip, 14 mınýt 18 sekýnd ishinde ekinshi bolyp jetti. Al 14 sekýndtan keıin Ilıa Kondaýrov 14 mınýt 32 sekýndta úzdik úshtikke ilindi.
2009-2010 jyldary týǵan jasóspirim qyzdar arasynda Shyǵys Qazaqstan oblysynan Varvara Nebogatova atý aımaǵynda bir ret qateleskenine qaramastan, jarys kóshbasshysy atandy. Ol márege 19 mınýt 05 sekýndta jetti. Onyń izinen 30 sekýnd aıyrmashylyqpen, jerlesi Angelına Afanaseva 19 mınýt 40 sekýndta kúmis júldeni ıelendi. Úshinshi bolyp jeńis tuǵyryna aqmolalyq Albına Hafızova kóterildi. Ol máre syzyǵyn 20 mınýt 10 sekýndta kesip ótti.
2011-2013 jyldary týǵan jasóspirim qyzdar arasynda Aqmola oblysynan Sofııa Jıgýlına 14 mınýt 19 sekýndta jeńimpaz atandy. Evelına Tımofeeva 20 sekýndqa ese jiberip, kúmis júldege ıe boldy. Al 14 mınýt 57 sekýndta Leıla Mýkatova jarystyń qola júldegeri atandy. Úsh bıatlonshy qyz atý aımaǵynda barlyq nysanany dál kózdep, asqan mergendik tanytty.
Erteń sportshylarymyz úshin demalys kúni. 7 naýryz, jarystyń sońǵy kúnin olar estafetamen aıaqtaıdy. Esterińizge sala keteıik, keshe jarystyń alǵashqy kúni jas bıatlonshylar sprınt saıysynda baq synap, jeńimpazdar men júldegerler anyqtalǵan bolatyn.
Jarysqa Aqmola, Shyǵys Qazaqstan, Soltústik Qazaqstan, Qaraǵandy, Abaı, Pavlodar, Batys Qazaqstan, Qostanaı, Almaty oblystary men Almaty qalasynan 160-qa jýyq bala qatysyp jatyr.