Beıjińde qytaı tilindegi qazaq ánderi jınaǵynyń tusaýkeseri ótti

BEIJІŃ. QazAqparat – Qytaı astanasynda Qazaqstan Respýblıkasy QHR-daǵy Elshiliginiń qoldaýymen Abaı Qunanbaev, Shámshi Qaldaıaqov, Altynbek Qorazbaev, Nurǵısa Tilendıev jáne basqalardyń 30 belgili mýzykalyq shyǵarmasyn qamtıtyn qytaı tilindegi tanymal qazaq ánderiniń alǵashqy aýdarma jınaǵynyń tusaýkeseri ótti, dep habarlaıdy QazAqparat SІM saıtyna silteme jasap.

Ánderdi aýdarýdy Mýzyka halyq baspasynyń járdemimen belgili jazýshy, Qytaı Halyqtyq saıası konsýltatıvtik keńesiniń burynǵy depýtaty Ákbar Májıtuly júzege asyrdy.

Іs-sharanyń qonaqtary Qytaıdyń memlekettik organdary, akademııalyq jáne shyǵarmashylyq zııalylary, qazaq dıasporasynyń ókilderi, sondaı-aq qytaılyq jáne qazaqstandyq BAQ jýrnalısteri boldy.

Qazaqstannyń Qytaıdaǵy Elshisi Shahrat Nuryshev óziniń sóz sóıleýinde mýzyka men ánder arqyly halyqtar arasynda mádenıet pen ádet-ǵurypty tereńirek qabyldaý oryn alatynyn erekshe atap ótti. Osyǵan oraı, ol bul jınaq Qazaqstan men Qytaı arasyndaǵy dostyq pen tatý kórshiliktiń irgetasyna taǵy bir jarqyn úles bolatynyna senim bildirdi. Qazaqstandyq dıplomat óz sózinde bıylǵy jyly Qytaıda mádenı is-sharalardy uıymdastyrý josparlarymen de bólisti.

Ákbar Májıtuly (1954 jyly týǵan) – qytaı tilinde jazatyn az ulttary ókilderinen turatyn QHR-dyń kórnekti jazýshylarynyń biri. 1982 jyly bastap Qytaı jazýshylar odaǵynyń múshesi, QHR Halyqtyq saıası konsýltatıvtik keńesiniń depýtaty bolǵan, úsh ret QHR Memlekettik syılyǵynyń ıegeri, II dárejeli «Dostyq» ordeniniń kavaleri, onnan astam kitaptyń, onyń ishinde Abaı shyǵarmalary aýdarmalarynyń avtory bolyp tabylady.

Ákbar Májıtulynyń aýdarmalary men shyǵarmashylyq izdenisteriniń arqasynda búgingi tańda qytaılyq oqyrmandar qazaq ádebıetiniń kórnekti klassıkteri men tanymal kompozıtorlardyń shyǵarmalarymen tanysa alady.