Beıjińde qysqy Olımpıada oıyndary qarsańynda COVID-19-ǵa qarsy sharalar kúsheıtildi

BEIJІŃ. QazAqparat - Beıjiń bıligi Qytaıdaǵy jańa jyl men qysqy Olımpıada oıyndary qarsańynda COVID-19-dyń aldyn alý jáne baqylaý sharalaryn kúsheıtýde. Bul týraly juma kúni Beıjiń qalasy úkimetiniń resmı ókili Sıýı Hetszıan málim etti, dep habarlaıdy «QazAqparat» HAA tilshisi.

Sıýı Hetszıannyń aıtýynsha, Pekın ákimshiligi COVID-19-dyń aldyn alý jáne baqylaý sharalaryn qaıta qarap, turǵyndardy aldaǵy merekeleri – Jańa jyl men Kóktem merekesin QHR astanasynda ótkizýge shaqyrdy. Jergilikti bılik kásiporyndarǵa aldaǵy merekeler kezinde óz qyzmetkerlerine ıkemdi jumys kestesin engizýdi usyndy. Otbasylyq merekelerdi 10 adamǵa deıin shekteý, sondaı-aq Beıjińde konferentsııalar men oqý is-sharalarynyń ótkizilýin qatań baqylaý týraly jarııalandy. Saıabaqtar, murajaılar, kitaphanalar, kınoteatrlar jáne basqa da qoǵamdyq oryndardyń tolýy 75% - dan aspaýy tıis.

Esterińizge sala keteıik, ótken beısenbide 13 mıllıon halqy bar Sıan qalasynda Qysqy Olımpıada oıyndarynyń ashylýyna 40 kún qalǵanda lokdaýn engizildi. 9 jeltoqsannan bastap Qytaıdyń osy megapolısinde koronavırýs ınfektsııasynyń 200-den astam jaǵdaıy anyqtaldy.

Rýslan Súleımenov