Beıjińde qazaqstandyq balalar Naýryz merekesin toılady
QHR-daǵy QR Elshisiniń jubaıy Álııa Nuryshevanyń quttyqtaý sózinen keıin jáne Qydyr atanyń batasy, shashý dástúrinen soń, qonaqtarǵa merekelik kontsert kórsetildi. Qyzdar «Naýryz» bıin bıledi, Múslıma Daıyn «Týǵan jerdeı jer bolmas» ánin shyrqady, Ramazan Sársen «Balbyraýyn» kúılerin, Ásem Qabazıeva «Týǵan jerim» ánin aıtty. Kontsert qatysýshylary estelik dıplomdarmen marapattaldy.
Elshilik ǵımaratynyń aýlasyna kıiz úı tigilip, balalarǵa naýryz kóje, baýyrsaq, manty, palaý jáne ózge de qazaqtyń ulttyq taǵamdary berildi. Taǵamdardy Qytaıdaǵy QR ulttyq kompanııa ókilderiniń, dıplomattardyń jubaılary ázirledi.
«Biz balalarǵa arnap Naýryz meıramyn uıymdastyrdyq. Qazaqstannan jyraqta júrse de, óz mádenıetin, salt-dástúrin umytpasyn dep, Naýryzdyń - Jańa jylymyz ekenin bilip júrsin degen nıetpen jasadyq», - dedi QazAqparat tilshisine bergen suhbatynda Beıjińdegi qazaqstandyq áıelder keńesiniń tóraıymy Gaýhar Shámshıeva.
Beıjińdegi aýanyń lastanýyna qaramastan (ındeks PM2.5 - tekshe metrine 181 mg-den, RM10 - tekshe metrine 217 mg-den), kóktemgi kúnniń ashyq bolýy men balalardyń óner kórsetýi, ulttyq kostıýmder merekelik kóńil-kúı syılady.