Beıjińde Qazaqstan týrızminiń áleýeti tanystyryldy

BEIJІŃ.QazAqparat –Seısenbi kúni Beıjińde «Jibek joly gologrammasy: Qazaqstanǵa tsıfrlyq týrızm – tehnologııalar múmkindikterdi keńeıtedi» tsıfrlyq kórmesi ashyldy, dep habarlaıdy QazAqparat menshikti tilshisi.

QR Mádenıet jáne sport mınıstri Dáýren Abaev óz sózinde kórme Qazaqstannyń týrıstik baǵytymen, mádenıetimen, dástúrimen jáne tarıhymen jaqynyraq tanysýǵa múmkindik beretinin atap ótti.

QR-nyń QHR-daǵy Elshisi Shahrat Nuryshev kórme qonaqtary men kelýshilerin Qazaqstannyń týrızm salasyndaǵy áleýeti týraly habardar etip, elimizde týrızmniń ekologııalyq, mádenı, tanymdyq, sporttyq túrleri baryn jetkizdi.

Іs-sharanyń resmı bóliminen keıin kelýshilerge Qazaqstan týrızminiń barlyq perspektıvaly túrleri kórsetilip, tanystyryldy. Sońynda kontserttik baǵdarlama boldy.

Kórme el astanasyndaǵy Shoýgan saıabaǵyndaǵy «Chjýngýantsýn» ınnovatsııalyq ortalyǵynda ótip jatyr. Іs-sharaǵa QHR mınıstrlikteri men vedomstvolarynyń, ShYU hatshylyǵynyń ókilderi qatysty.