Beıjińde Qazaqstan Qarýly Kúshteriniń 26 jyldyǵy atalyp ótti
Іs-sharaǵa QHR-daǵy QR Elshisi Shahrat Nuryshev, Qytaı ulttyq qorǵanys ýnıversıteti Birlesken operatsııalar ınstıtýty rektorynyń orynbasary, Beıjiń akkredıtatsııalanǵan dıplomatııalyq ókildikter basshylary, 70-ten astam sheteldik memlekettiń áskerı attasheleri, Shanhaı yntymaqtastyq uıymdarynyń ókilderi, BAQ jáne basqalar qatysty.
Qazaqstan men Qytaıdyń memlekettik ánurandary oryndalǵannan keıin, qabyldaý qonaqtaryna QHR-daǵy QR Qorǵanys mınıstrliginiń áskerı attashesi Erkin Mamythanov Qazaqstan Qarýly Kúshteriniń tarıhy týraly aıtyp berdi.
«Qazaqstan Qarýly Kúshteri aýqymdy jańarý nátıjesinde búginde joǵary mobıldi, jaqsy jaraqtalǵan jáne kásibı. Biz BUU aıasynda bitimgerlik áreketterge, sondaı-aq ShYU formatynda halyqaralyq áskerı jáne antıterrorıstik jáne basqa da uıymdardyń oqý-jattyǵýlaryna belsendi qatysyp kelemiz. Qazaqstan Halyqaralyq áskerı oıyndarǵa basa nazar aýdarýda. Bıyl Qazaqstan osy oıyndardyń 3 kezeńin óz aýmaǵynda ótkizedi», - dedi ol.
Áskerı dıplomat Qazaqstannyń Qytaımen jan-jaqty áskerı yntymaqtastyqty damytyp jatqandyǵyn atap ótti.
Qytaıdaǵy Iran elshiliginiń áskerı attashesi Saıd Alı Samadııa QazAqparatqa bergen suhbatynda Qazaqstan Qarýly Kúshteriniń 26 jyldyǵymen quttyqtady.
«Iran men Qazaqstan qarýly kúshteriniń arasyndaǵy yntymaqtastyqtyń joǵary deńgeıde ekendigin atap ótkim keledi. Taıaýda Irannyń áskerı-teńiz kúshteri kemeleri Qazaqstannyń Kaspıı teńizindegi portyna bardy jáne olardy jyly qarsy aldy», - dedi ol.
QHR-daǵy Ázerbaıjan áskerı attashesi, ekinshi dárejeli kapıtan Elchın Djafarov QR Qarýly Kúshterine Otandy qorǵaý jolynda kúsh-qýatynyń arta berýin tiledi.
«Bizdi baılanystyratyn dúnıe kóp - tarıhı, mádenı baılanystar, memleket basshylarynyń jyly qatynastary, jalpy halyqtarymyz baýyrlas. Taǵy bir baılanystyratyn faktorlardyń biri - Kaspıı teńizi, bul - beıbitshilik pen dostyqtyń aıdyny», - dedi áskerı dıplomat.
Qabyldaý aıasynda Astana qalasynyń 20 jyldyǵyna arnalǵan fotokórme ótti. Qonaqtar álemdegi eń jas astana - Qazaqstan elordasynyń damýy men qurylý tarıhymen tanysty.