Beıjińde Elbasynyń bastamalary talqylandy
Qazaqstannyń Qytaıdaǵy elshisi Shahrat Nuryshev óziniń sózinde, Qazaqstan Prezıdenti Nursultan Nazarbaevtyń qańtardaǵy Joldaýy men Elbasynyń bıylǵy jylǵy naýryzda jarııa etken 5 áleýmettik bastamasynyń negizgi baǵyttaryna toqtaldy.
«Ózderińiz kórip otyrǵandaı, Prezıdenttiń Joldaýy da, bes áleýmettik bastamasy da tsıfrlandyrý, jańa tehnologııalar men ınnovatsııalar taqyrybyn qaýzady. Tyń tehnologııalar men olardy óndiriske engizýge kelgende Qytaı keıingi jyldary kóptegen jetistikterge jetti. Qytaılyq iri kompanııalar kapıtalızatsııa boıynsha batys kompanııalaryn basyp ozyp, álemde aldyńǵy qatarǵa shyqty. Sondyqtan, jańa bastamalardy júzege asyrý jaǵdaıynda Qazaqstan jaqyn kórshisi ári seriktesi - QHR-men ózara tıimdi ári dostyq qarym-qatynasty bekemdeýge múddeli», - dedi ol.
Dıplomat eki memleket arasyndaǵy saıası dıalogtyń, ekonomıkalyq kún tártibiniń joǵary deńgeıin, «Nurly Jol» baǵdarlamasynyń «Bir beldeý, bir jol» bastamasynyń ushtasyp jatqanyn atap ótti.
«Saıasat salasynda bizdiń memlekettter bastap otyrǵan bastamalardy qoldaýdyń mańyzy asa zor. Syrtqy saıasattaǵy ustanymdarymyzdyń bir parasynyń sáıkestigi men jaqyndyǵy osyǵan múmkindik týǵyzyp otyr. Іshki saıasattaǵy qaǵıdattarǵa adal bolyp qala otyryp, biz álemdik ekonomıkada synı mejeniń jaqyndaǵanyn atap otyrmyz. Qazirgi tańda álem úlken ózgeristerge ushyrap jatyr. Saıası turaqsyzdyq pen ekonomıkalyq týrbýlenttilik, transulttyq terrorızm men qylmystardyń tipti elder men keıde búkil aımaqtarda ýshyǵyp bara jatqany qaýipsizdikti qamtamasyz etý máselesin aldyńǵy qatarǵa shyǵaryp otyr», - dedi elshi.
Ol sóz sózinde halyqaralyq qaqtyǵystardy retteý (Astana protsesi), jańa qaýiptermen kúreste aımaqtyq jáne jahandyq yntymaqtastyqty (UQShU-daǵy tóraǵalyq) keńeıtý, beıbitshilik pen qaýipsizdikti nyǵaıtý (Jahandyq strategııalyq bastamalardyń Jospary - 2045, «Beıbitshilik. HHІ ǵasyr» Úndeýhaty), BUU Qaýipsizdik Keńesindegi turaqty emes múshelik, osy jyldyń qańtar aıynda atalǵan qurylymǵa tóraǵalyq etý, Azııadaǵy Ózara Yqpaldastyq jáne Senim Sharalary jónindegi Keńesti ary qaraı ınstıtýtsıonalızalaý, G-Global alańyn qurý, ShYU-daǵy belsendi ustanym boıynsha Qazaqstannyń halyqaralyq bastamalaryn eske saldy.
Dóńgelek ústel barysynda qytaılyq sarapshylar QR Prezıdentiniń Joldaýy men bes áleýmettik bastamasyn joǵary baǵalap, Qazaqstan men Qytaı aldaryna uqsas maqsattardy qoıyp otyrǵanyn atap ótti. Eki eldiń arasynda ary qaraı jan-jaqty strategııalyq yntymaqtastyqty nyǵaıtý boıynsha tyń ıdeıalar aıtyldy.
Sharaǵa 40-qa jýyq óki qatysty. Atap aıtqanda, «G-Global Halyqaralyq hatshylyǵynyń» jetekshisi Serik Nógerbekov, QKP OK, QHR SІM Halyqaralyq bólimderiniń, QHR Memlekettik keńesiniń janyndaǵy zertteý jáne damytý Ortalyǵynyń Eýropa men Azııa damý ınstıtýtynyń, Qytaı zamanaýı halyqaralyq qatynastar akademııasynyń, Qytaı halyqaralyq máseleler ınstıtýtynyń, Qytaı qoǵamdyq ǵylymdar akademııasynyń Reseı, Shyǵys Eýropa men Ortalyq Azııa ınstıtýtynyń, Qytaı halyq shekara syrtyndaǵy dostyq qoǵamdastyǵynyń, QKP Ortalyq partııa mektebiniń janyndaǵy reformalar forýmynyń ókilderi qatysty.