Beıjińde Astana HQO bırjasynyń bolashaǵy talqylandy

BEIJІŃ. QazAqparat - Qaırat Kelimbetov bastaǵan «Astana» halyqaralyq qarjy ortalyǵynyń delegatsııasy Beıjińde birqatar mańyzdy kezdesý ótkizdi, dep habarlaıdy «QazAqparat» HAA-nyń Qytaıdaǵy menshikti tilshisi.

Qaırat Kelimbetov QHR Qundy qaǵazdary naryǵyn retteý komıssııasynyń tóraǵasy Lı Shııýı, Shanhaı qor bırjasynyń tóraǵasy Ý Tsınmen, Infraqurylymdyq Investıtsııalar Azııalyq bankiniń vıtse-prezıdenti, Qytaı Ónerkəsiptik jəne kommertsııalyq bankiniń (ICBC) ókilderimen kezdesti.

Kezdesý aıasynda AHQO men Qytaı retteýshileri arasyndaǵy yntymaqtastyq, qytaılyq ınvestorlardyń qazaqstandyq kapıtal naryǵyna enýi, AHQO bırjasyn qurý jəne damytý boıynsha Shanhaı Qor bırjasymen strategııalyq yntymaqtastyq, Qazaqstandaǵy qytaı bankteriniń AHQO bazasyndaǵy eseptik-klırıngtik qyzmettiń damýy məseleleri talqylandy.

Taraptar Qazaqstannyń qundy qaǵazdary naryǵynyń AHQO bazasynda damýyna degen aıtarlyqtaı əleýeti bar ekendigin aıtty, sonymen qatar, retteýshilerdiń yntymaqtastyǵy men AHQO bırjasyn damytýǵa degen strategııalyq seriktestigi, AHQO-nyń «Jibek jolynyń ekonomıkalyq beldeýi» baǵdarlamasy aıasynda qarjy qyzmetin kórsetetin ortalyq retinde jumys isteýine múmkindik beretinine toqtaldy.

Eske sala ketsek, Elbasy QHR-ǵa eki kúndik saparmen bardy. Onda QR Prezıdenti Beıjińde «Bir beldeý, bir jol» baǵdarlamasy aıasynda halyqaralyq yntymaqtastyqty nyǵaıtý maqsatynda joǵary deńgeıdegi forýmǵa qatysýda.

Oǵan 29 memlekettiń prezıdentteri men úkimet basshylary, sondaı-aq BUU, Dúnıejúzilik bank pen Halyqaralyq valıýta qorynyń ókilderi keldi.