Beıjińde 1500-ge jýyq qazaqstandyq saılaýǵa qatysa alady

BEIJІŃ. QazAqparat -Qazaqstan Prezıdentin saılaý ótkizý kezeńinde Beıjińde daýys berýshiler sany 1500 adamǵa jýyqtaıdy. Bul týraly QHR-daǵy QR Elshisi Shahrat Nuryshev arnaıy brıfıngte málimdedi, dep habarlaıdy QazAqparat menshikti tilshisi.

«QHR-daǵy QR Elshiligi janynda №257 saılaý ýchaskesi jumys isteıdi. Bizdiń derekter boıynsha, Beıjińde 1500 qazaqstandyq saılaýshy bar. Olardyń arasynda stýdentter, jaqyn mańda ornalasqan qalalardaǵy áskerı JOO kýrsanttary, dıplomattar, ulttyq kompanııa ókilderi men olardyń otbasy músheleri bar», - dedi ol QazAqparat tilshisiniń qoıǵan suraǵyna jaýap bere otyryp.

Onyń aıtýynsha, saılaý ýchaskeleri Shanhaı (№294) jáne Gonkong (№293) qalalaryndaǵy bas konsýldyqtar janynda da ashylady.

«Jeke shaqyrtýmen, qyzmettik, iskerlik jáne týrıstik saparlarmen Qytaıǵa kelgen Qazaqstan Respýblıkasynyń azamattary ýchaskelik saılaý komıssııasyna ótinish bergen jaǵdaıda jáne QR azamattyǵy týraly tólqujaty bolsa, saılaýshylar tizimine engiziledi», - dep atap ótti Sh.Nuryshev.

Qazaqstandyq dıplomat qytaılyq jýrnalısterge eldiń aldaǵy saılaýǵa daıyndyǵy, Memleket basshysy laýazymyna úmitkerler jaıly, halyqaralyq baqylaýshylar týraly qysqasha aıtyp berdi.

Avtor: Sadyq Ákejanov