Beıjiń Olımpıadasynda top jarýǵa bar kúshimdi salamyn - frıstaılshy Aıaýlym Ámrenova

PHENChHAN. QazAqparat - Búgin Ońtústik Koreıadaǵy Qazaqstan baspasóz ortalyǵynda frıstaılshy Aıaýlym Ámrenova QazAqparat tilshisine suhbat berip bolashaq armany týraly aıtty, dep habarlaıdy QazAqparat tilshisi.

Aıaýlym Ámrenova Phenchhanda ótken Olımpıada oıyndarynda júldeli oryndarǵa qol jetkize almaǵan bolatyn. Alaıda, 16 jastaǵy qazaq qyzy bolashaǵynyń alda ekenin aıtty.

- Bul Olımpıada oıynynda saǵan ne jetispedi dep oılaısyń?

- Men Olımpıada oıyndaryna tuńǵysh ret qatysyp otyrmyn. Sondyqtan shyǵar eń birinshi tájirıbe jetispedi. Men úshin doda úlken synaq edi. Alaıda, baǵym janbady. Men úshin barlyq jeńister alda. Buıyrsa 2022-Beıjiń Olımpıadasynda top jarýǵa bar kúshimdi salamyn. Jáne Beıjińge eń úlken daıyndyqpen baramyn.

- Qazaqstan quramasyndaǵy eń jas sportshylardyń biri ekenińizdi jaqsy bilemiz...

- Bıyl 16 jastamyn. Biraq, Phenchhan Olımpıadasyndaǵy sátsizdigimdi jastyǵymmen baılanystyrǵym kelmeıdi. Ózderińiz jańa estigendeı baspasóz otyrysynda bapkerler meni «bolashaq chempıonymyz» dep ázildep jatyr. Iá, aýyzdaryna Alla salyp jatqan shyǵar. Bolashaqta Olımpıada shyńyn baǵyndyramyn degen úmittemin.

- Meniń oıymsha, 16 jasta Olımpıadaǵa qatysýdyń ózi úlken jetistik qoı...

- Árıne, qysqy sportty alǵanda bunyń ózi úlken jetistik dep aıtar edim. Jasyrary joq, bizdiń elde qysqy sport túrleri sál keshigip damı bastady. Endi-endi qazaqtyń qarakóz uldarymen qyzdary qysqy sport túrlerine den qoıyp jatqandaı bolady maǵan. Solardyń qatarynda men de barmyn.

- Jarys kezinde qobaljý boldy ma?

- Árıne, alǵashy eń iri dodam ǵoı. Úlken alamannyń shańyn kórdim. Endi, aldaǵy ýaqyttarda boı aldyrǵan qatelikterimmen jumys jasap, ózimdi shyńdaıtyn bolamyn.

- Kóptegen eldiń sportshylary osy frıstaıl, mogýl, taý shańǵysy sııaqty ashyq aspan astynda ótetin jarystarda aýa raıynyń qolaısyz bolǵany týraly shaǵymdanyp jatqan kórinedi. Sizge bul jaǵy áser etpedi ma?

- Maǵan aýa raıy asa bir qolaısyzdyq týdyrǵan joq. Sondyqtan, jarystaǵy sátsizdigimdi aýa raıyna, bolmasa tóreshilerge ıtergim kelmeıdi. Tek ózimniń tájirıbemniń azdyǵynan kóremin.

- Endi, aldaǵy josparyń týraly aıta ketseń?

- Alda maqsat kóp. Sporttyń syrtynda oqýym bar. Bárin sátti aıaqtaǵym keledi. Kelesi Olımpıdaǵa deıin áli tórt jyl ýaqyt bar. Oǵan deıin mende ósemin, tájirıbem de tolysady degen senimdemin. Sondyqtan, 2022- Beıjiń meni kút degim keledi. Olımpıadada qoldaý bildirgen, jankúıer bolǵan barlyq otandastaryma alǵys aıtamyn.

- Áńgimeńizge rahmet!