Beıjiń olımpıadasy qarsańyndaǵy daıyndyǵymyz qandaı
Olımpıadaǵy irikteý jarystary qańtar aıynyń ekinshi onkúndiginiń sońyna qaraı márege jetedi. Odan keıin Beıjińde olımpıada bastalady. Olımpıada qarsańynda qazaqstandyqtar kórsetip júrgen nátıjelerge arnaıy toqtalyp óteıik.
Frıstaıl-mogýl
Jarystyń bul baǵdarlamasynda basty úmitimiz ıÝlııa Galysheva synǵa túsedi. Galysheva 2018 jyly Phenchhan olımpıadasynda sátti óner kórsetip, úzdik úshtikke engen edi. Jańa maýsymdy daraboz sportshymyz 4 jeltoqsanda Fınlıandııanyń Rýka qalasynda ótken álem kýbogy kezeńinen bastady. Munda ol 75,8 upaımen jetinshi orynnan kórinse, Anastasııa Gorodko – 15, Aıaýlym Ámirenova 24 orynda qaldy. Erler arasynda olımpıada chempıony Maıkl Kıngberrıdiń izin ala Pavel Kolmakov ekinshi nátıje kórsetti. Pavel Kıngsberrıden nebary 0,89 upaı utyldy. Sergeı Romanov – 42, Oleg Tsın – 47, Roman Bondarev 60 nátıje tirkedi.
Odan keıin Shvetsııanyń Idre qalasynda ótken álem kýbogy kezeńinde Galyshevanyń nátıjesi nasharlaı túskenin baıqadyq. Ol jeke synda úzdik ondyqqa ene almady (13 oryn, 76,55 upaı). Jarysty Ámirenova – 28, Gorodko – 32, Olesıa Graýr 37 orynmen aıaqtady. Erler arasynda Kolmakov 82,52 upaımen besinshi satyǵa syrǵydy. Qalǵan úsh sportshy qyryq myqtynyń arasyna ene alǵan joq.
Alp de ıÝzde (Frantsııa) ótken úshinshi kezeńde áıelder arasynda 16 jastaǵy A.Gorodko úzdik ondyqqa ene aldy. Galysheva – 14, Ámirenova 21 kórsetkishke ıe. Erler arasynda Kolmakov úzdik ondyqtan tómendegen joq. Degenmen bul joly onyń taǵy da tómendeı túskenin baıqaýǵa bolady (8 oryn).
Qoryta kelgende, olımpıada qarsańynda Pavel Kolmakovtyń nátıjeleri úmitke jeteleıdi. Al Galysheva babyna asyqpaı enip, týra olımpıadaǵa saqadaı saı bolyp barýdy kózdeıtin sııaqty. Al Gorodkonyń progresi, árıne, qýantpaı qoımaıdy.
Erler arasynda qazir M.Kıngsberrı men japonııalyq álem chempıony Ikýma Horısımanyń kórsetkishteri óte jaqsy.
Áıelder arasynda avstralııalyq Jakara Antonı úsh kezeńde de júldegerler qataryna endi, al taǵy bir japonııalyq sportshy Anrı Kavamýra eki ret jeńis tuǵyrynan oryn tapty. Biraq olardy Beıjiń olımpıadasynyń favorıti deýge erte.
Frıstaıl-akrobatıka
Bul baǵdarlamada bar úmitimiz Janbota Aldabergenovada ekeni sózsiz. Shymkenttik sportshy álem kýbogynyń 2 jeltoqsandaǵy alǵashqy kezeńinde kúmis medal jeńip alǵan edi. Ol Qytaı sportshysy Koń Fanıýdi ǵana alǵa jiberdi.
Aqmarjan Qalmyrzaeva – 13, Aıana Joldas – 23, Marjan Aqjigit 39 orynǵa laıyq baǵalandy. Bir kúnnen keıin ótken ekinshi kezeńde Janbota burynǵy bıigin ustap tura almady (28 oryn). Al Qalmyrzaeva turaqty óner kórsetti (14 oryn), Joldas pen Aqjigit kóp alǵa jyljı qoıǵan joq.
Bul kúni erler arasynda Sherzad Qashyrbaevtyń alǵashqy kezeńde úzdik tórttikke enýi aıtarlyqtaı oqıǵa boldy. Roman Ivanov pen Ildar Batrýtdınovter úzdik otyz sportshy sanatynan tys qaldy.
Jalpy osyǵan deıingi tórt kezeń de Rýkada (Fınlıandııa) uıymdastyryldy. 11 jeltoqsanda ótken úshinshi kezeńde Aldabergenova qaıta serpildi. Bul joly ol jarys kúnin úzdik tórttikte aıaqtady.
Aqjigit 14 orynǵa serpilip, jaqsy ilgerilese, Qalmyrzaeva burynǵysynan tórt saty keıindedi (18 oryn). Bir kúnnen keıin Aldabergenova – 8, Qalmyrzaeva – 22, Joldas – 25, Aqjigit 30-nátıje tirkedi.
Osy kórsetkishterge qaraı otyryp, Janbotanyń maýsymǵa jaqsy kirigip kele jatqanyn baıqaýǵa bolady. Beıjiń olımpıadasy kezinde naǵyz babynda bolsa, Aldabergenova úlken sensatsııa jasaýy da yqtımal.
Al Aqmarjan sońǵy kezde jaqsy ósip kele jatyr. Álem kýbogynyń ázirge sońǵy kezeńinde ǵana ol úzdik jıyrma sportshynyń sapyna ene almady. Joldas pen Aqjigitke áli de turaqtylyq jetpeı jatyr.
Erler arasynda Sh.Qashyrbaev úshinshi kezeńdi – 9, tórtinshi kezeńdi 33 orynmen támamdady. ıAǵnı Sherzad ta áli turaqty óner kórsete alyp jatqan joq. Biraq eki birdeı kezeńde úzdik ondyqqa enýi bul sportshynyń áleýeti zor ekenin baıqatady.
Erler arasynda reseılik Maksım Býrovtyń daıyndyǵy tastúıin. Ol tórt kezeńde de top jardy. Áıelder arasynda naqty kóshbasshy joq. Tórt kezeńde tórt eldiń sportshysy eń bıik tuǵyrǵa kóterildi.
Short-trek
Sońǵy jyldary damý qarqyny joǵarylap, óz arasynan álemdik deńgeıde myqty sportshylar tárbıelep shyǵarǵan sport túrleriniń biri – osy short-trek.
Qazaqstandyq jankúıerlerdiń jadynan Nurbergen Jumaǵazıev pen Abzal Ájiǵalıevtiń jetistikteri óshe qoımaǵany anyq. Bıylǵy maýsymdy da short-trekshilerimiz jaqsy bastaǵan edi.
Beıjińdegi bolashaq olımpıadany qabyldaıtyn arenada 23-24 qazanda ótken álem kýbogy kezeńinde eki otandasymyz úzdik úshtikke endi: aldymen Denıs Nıkısha 500 metr qashyqtyqta qola júldeger atansa, araǵa bir kún salyp Ádil Ǵalıahmetov 1500 metr jarysta kúmiske qol jetkizdi.
Ekinshi kezeń qazan aıynyń sońynda Japonııanyń Nagoıa qalasynda uıymdastyryldy. Munda da Nıkısha 500 metrde máre syzyǵyn úshinshi bolyp kesti.
Biraq sodan keıin short-trekshilerimiz jeńis tuǵyryna kóterile almaı keledi. Debretsen (Vengrııa, 18-21 qarasha), Dordreht (Nıderland, 25-28 qarasha) qalalarynda ótken syndarda erler de, áıelder de tabys bıiginen kórine almady.
Álem kýbogynyń qorytyndysynda eshbir sportshymyz úzdik bestikke ene alǵan joq. Degenmen bul jarystardyń bárin olımpıadaǵa daıyndyq kezeńi dep qarastyramyz.
2014 jylǵy Sochı olımpıadasynan beri short-trekshilerimiz olımpıada júldesine jaqyndap kele jatqandaı kórinedi. Juldyzdy sát Beıjińde týyndap jatsa, esh artyq bolmas edi.
Shańǵymen júgirý
Vladımır Smırnov, Andreı Nevzorov dáýirinen keıin Nıkolaı Chebotko men Alekseı Poltoranın Qazaqstannyń týyn biraz synda jelbiretken edi.
Alaıda Chebotko sporttaǵy ǵumyryna núkte qoıa sala, jol apatynan kóz jumdy. Poltoranın dopıng daýyna shyrmalǵan kúıi habarsyz. Qazirgi qazaqstandyq shańǵyshylar jankúıerlerin jýyq arada qýanta qoıýy da ekitalaı.
Rýkada (Fınlıandııa), Lıllehammerde (Norvegııa), Davosta (Shveıtsarııa), Drezdende (Germanııa) ótken álem kýbogy kezeńderinde qazaqstandyq shańǵyshylardyń birde-bireýi úzdik 50 sportshy qataryna ene alǵan joq.
Vıtalıı Pýhkalo, Oljas Klımın, Evgenıı Velıchko, Naıl Bashmakov, Ivan Lıýft sııaqty sportshylar olımpıadaǵa joldama alǵan kúnniń ózinde qara kóbeıtýshiler qatarynda qalsa, esh tańdana qoımaımyz.
Olar jaqyn-jýyqta Iohannes Klebo, Sımen Krıýger, Aleksandr Bolshýnov, Ivo Nıskanen sııaqty serkelerge básekeles bola almaıdy.
Áıelder arasynda Ksenııa Shalygına, Nadejda Stepashkına, Valerııa Tıýleneva, Angelınga Shýryga sııaqty sportshylarymyz da jańa maýsymda eshbir jarysta úzdik otyzdyqqa enbedi.
28 jeltoqsanda Shveıtsarııanyń Lentserhaıd qalasynda shańǵymen jarysýdan «Týr de Skı» kópkúndigi bastalady. Bul synǵa Qazaqstan atynan Pýhkalo, Velıchko, Shalygına jáne Shýryga qatysady.
Konkımen júgirý
Bul sport túri boıynsha qazirge deıin álem kýbogynyń segiz kezeńi ótti. Árıne, 12-14 qarashada Polshanyń Tomashov qalasynda ótken kezeńde Nadejda Morozovanyń 1500 metr qashyqtyqta qola júlde jeńip alýy sensatsııaǵa teń jańalyq boldy.
Ulttyq qurama bas bapkeri Dmıtrıı Babenko pandemııaǵa baılanysty álem kýbogy kezeńderiniń de, tipti keıbir baǵdarlamalardyń da qysqarý sportshylarǵa psıhologııalyq soqqy bolyp jatqanyn aıtyp qaldy.
«Olımpıadaǵa joldama alǵan sportshylar tizimi resmı túrde qańtar aıynda belgili bolady. Al qysqy oıyndar bastalǵansha sportshylar elde jattyǵý jıynyn ótkizbekshi. Daıyndyqtyń negizgi bóligin Nur-Sultanda ótkizemiz. Sondaı-aq olımpıadaǵa attanbas buryn, elordada baqylaý jarystaryn uıymdastyramyz degen josparymyz bar. Jattyǵý jıyndary jospar boıynsha ótip jatyr. Sportshylarymyz olımpıadaǵa babynda barý úshin bar jaǵdaıdy jasaımyz», – dedi bas bapker.
Bul sport túrinen Kanadanyń Kalgarı qalasynda ótken tórt qurlyq chempıonatynda Denıs Kýzın, Dmıtrıı Morozov, Ekaterına Aıdova sııaqty sportshylardyń top jarýy da súısintti. Biraq olardy olımpıada júldesinen úmitker deýge bola qoımas.
Bıatlon
Ekaterına Hrýstaleva dáýirinen keıin Qazaqstan bıatlonynyń jarq etken juldyzdy shaǵy aıaqtalǵan sııaqty. Jaqynda ulttyq qurama bapkerleri bul sporttan izbasarlar tabýdyń ózi qıyn soǵyp otyrǵanyn aıtty.
Danıl Beletskıı, Aleksandr Mýhın, Vladıslav Kıreev, Galına Vıshnevskaıa, Darıa Klımına, Anastasııa Kondrateva sııaqty sportshylar jańa maýsymda jeke jarystarda da, komandalyq estafetalarda da kózge túse alatyn emes.