Beıjiń-2022: Olımpıadanyń úshinshi kúninde qazaqstandyq sportshylar qalaı óner kórsetti

NUR-SULTAN. QazAqparat - Qytaı astanasy Beıjiń qalasynda ótip jatqan Aq Olımpıada oıyndarynda qazaqstandyq atletter 2 sport túrinen synǵa tústi, dep habarlaıdy QazAqparat.

Qazaqstandyq sportshylar arasynda birinshi bolyp jarys jolyna konkımen júgirý saıysynda 1500 metr qashyqtyqqa Nadejda Morozova men Ekaterına Aıdova shyqty. Ekeýi de quramadaǵy tájirıbeli sportshylar edi, jankúıerler olardy úzdikter qatarynan kóremiz dep úmittengen.

Alaıda, qos sportshymyzda biz kútken úmitti aqtaı almady.

Nadejda Morozova 1500 metr qashyqtyqtaǵy jarysyn 14-shi orynmen aıaqtady. Al Aq Olımpıadanyń ashylý saltanatynda kókbaıraǵymyzdy kóterip shyqqan Ekaterına Aıdova bul syndy 18-shi orynmen aıaqtady.

Bul sport túrinen, ıaǵnı 1500 metr qashyqtyqta gollandııalyq sportshy Iren Vıýsttiń mereıi ústem boldy. Ol bir jarym shaqyrymdyq qashyqtyqty 1:53:23 ýaqytymen baǵyndyryp, Olımpıada rekordyn jańartty. Osylaısha, Vıýst Olımpıada oıyndarynyń alty dúrkin chempıony atandy. Al ekinshi orynǵa 1:53:72 nátıjesimen jetken japondyq atlet Mıho Takagı ıe bolsa, úzdik úshtikti 1:54:82 mınýtta baǵyndyrǵan Nıderlandy eliniń ókili Antoınet túıindedi.

Qazaqstandyq sportshylardyń nátıjesi tómendegideı:

Nadejda Morozova – 14-oryn (1:56.85),

Ekaterına Aıdova – 18-oryn (1:59.01).

Sondaı-aq, búgin bıatlonnan Galına Vıshnevskaıa-Sheporenko jarys jolyna shyqty. Ol 15 shaqyrymǵa jekeleı jarysty +5:19.6 nátıjesimen 44-orynmen aıaqtady.

Alaıda, osy nátıjesiniń arqasynda ol iz kesý jarysyna joldama alǵan 60 sportshynyń qataryna endi.

Bul dodada germanııalyq Denıh Herrman 44:12.7 (0+0, 1+0) kórsetkishimen bas júldeni jeńip aldy. Ekinshi oryndy +9.4 (0+0, 0+1) nátıjemen frantsııalyq Anaıs Shevale-Býshe qanjyǵasyna baılady. Al úzdik úshinshi orynǵa +15.3 (1+0, 0+1) qorytyndysymen norvegııalyq Marte Olsbıý-Roıselann ıe boldy.

Jarysqa barlyǵy 86 sportshy qatysty.

Osylaısha, Olımpıadanyń úshinshi kúninde de Qazaqstan quramasyna eshqandaı júlde buıyrmady.