Beıjiń-2022: Konkımen júgirýden Qazaqstan komandasynda ózgerister boldy

NUR-SULTAN. QazAqparat - Beıjiń qalasynda ótip jatqan Olımpıada oıyndarynda konkımen júgirýden Qazaqstan komandasy sapynda ózgerister oryn aldy, dep habarlaıdy QazAqparat tilshisi.

Bul týraly QR Ulttyq olımpıadalyq komıteti málim etti.

Erteńgi Olımpıada oıyndarynda erler arasyndaǵy 1000 metrlik jarysta Ivan Arjanıkovtiń ornyna Dmıtrıı Morozov shyǵady.

«Erler arasynda 1000 metrge júgirýden komandada ózgeris bar. Ivan Arjanıkov densaýlyǵyna baılanysty jarysqa qatysa almaıdy. Onyń ornyna Dmıtrıı Morozov shyǵady dep sheshtik. Árıne, bul Morozov úshin aıtarlyqtaı yńǵaıly jarys emes. Biraq ol sońǵy kezderi 1500 metrde ózin jaqsy kórsetip júr. Sondaı-aq, bul báseke mass-start aldynda jaqsy daıyndyq bolmaq», - dedi bas bapker Dmıtrıı Babenko.

Aıta keteıik, erler arasyndaǵy 1000 metrlik jarys erteń Nur-Sultan ýaqytymen 14.30-da ótedi.

Qazir Aq Olımpıadada oıyndarynda elimizdiń namysyn 8 sport túrinen 34 sportshy qorǵap jatyr.

Olar - qysqy sport oıyndarynyń ishinde sporttyń shańǵy jarysy, frıstaıl-mogýl, shańǵy akrobatıkasy, taý shańǵysy, shańǵymen sekirý, bıatlon jáne short-trek túrlerinen synǵa túsýde.

Beıjiń Olımpıadasy 20 aqpanda máresine jetedi.