Beıjiń-2022: Qazaqstandyq short-trek sheberleri qansha syıaqy alady

NUR-SULTAN. QazAqparat - Short-trekten Olımpıada oıyndarynda úzdik bestikke jáne tórttikke engen qazaqstandyq short-trekshiler qansha qarjylaı syıaqy alady, dep habarlaıdy QazAqparat.

Osydan bir kún buryn short-trekten Qazqstan Ulttyq quramasynyń bas bapkeri Mádiǵalı Qarsybekov Beıjińdegi Olımpıada oıyndaryn qorytyndylap, óz shákirtteriniń jetistigin joǵary baǵalady. Sondaı-aq, júldeli orynǵa synyq súıem jetpeı qalǵandaryna ókinish te bildirdi.

Beıjiń Olımpıadasynda el tarıhynda alǵash ret qos sportshymyz jekeleı synnyń fınalyna shyqty. Jarystyń alǵashqy kúnderi Ádil Ǵalıahmetov erekshe kózge túsken bolatyn. Ol 1500 metrlik básekeniń fınalyna deıin jetti. Alaıda sońǵy medalǵa talas kezinde 8-shi satyǵy turaqtady.

Odan keıin Abzal Ájiǵalıev 500 metrlik básekede 4-shi oryn aldy. Osylaısha júldeli orynǵa bir qadam úlgermeı qaldy.

Buǵan qosa, jerlesterimiz aralas estafetada aldyńǵy 5-tikten tabyldy. jetistikteriniń arqasynda ulttyq qurama sportshylary 70 myń dollar syıaqy alady.

Atap aıtsaq, Qazaqstanda Olımpıada júldegerlerinen bólek 4-shi, 5-shi jáne 6-shy oryn alǵan atletterge de syıaqy berý qarastyrylǵan.

Sol sebepti, Abzalǵa 4-shi oryn úshin 30 myń dollar tabystalady. Al estafetada el namysyn qorǵaǵan Abzal Ájiǵalıev, Denıs Nıkısha, Olga Tıhonova jáne ıAna Han tórttigine 10 myń dollardan beriledi.

Al Olımpıada oıyndarynda altyn alǵan sportshyǵa 250 myń, al kúmis pen qolaǵa, sáıkesinshe 150 jáne 75 myń dollardan beriledi.

Aıta keteıik, atalǵan Aq Olımpıadada oıyndarynda elimizdiń namysyn 8 sport túrinen 34 sportshy qorǵap jatyr.

Olar - qysqy sport oıyndarynyń ishinde sporttyń shańǵy jarysy, frıstaıl-mogýl, shańǵy akrobatıkasy, taý shańǵysy, shańǵymen sekirý, bıatlon jáne short-trek túrlerinen synǵa túsýde.

Beıjiń Olımpıadasy 20 aqpanda máresine jetedi.