Beıjiń-2022: Qazaqstandyq shańǵyshy TOP-25 qataryna kirdi

NUR-SULTAN. QazAqparat - Búgin Beıjiń Olımpıadasynda erler arasynda shańǵy jarysynan klassıkalyq stılden 15 shaqyrymdyq básekeler ótti, dep habarlaıdy QazAqparat tilshisi.

Atalǵan qashyqtyqta el namysyn Vıtalıı Pýhkalo men Evgenıı Velıchko qorǵady.

Jarys nátıjesi boıynsha jalpy jarys jolyna shyqqan 99 shańǵyshylar arasynan Vıtalıı Pýhkalo márege 25-shi, al Evgenıı Velıchko 40-shy bolyp jetti. Jerlesterimiz Pýhkalo tıisti qashyqtyqty 40:39:6 ýaqytta baǵyndyrsa, Velıchko 41:27:3 ýaqytta júrip ótti.

Bul dodanyń bas júldesin fınlıandııalyq Iıvo Nıskanen jeńip aldy. Kúmisti reseılik Aleksandr Bolshýnov qanjyǵasyna baılasa, úzdik úshtikti norvegııalyq Iohannes Klebo enshilep Beıjiń olımpıadasynyń qola júldegeri atandy.

Shańǵy jarysy

15 km, klassıkalyq stıl. Erler

1. Iıvo Nıskanen (Fınlıandııa) – 37:54,8

2. Aleksandr Bolshýnov (Reseı) +23,2

3. Iohannes Hesflot Klebo (Norvegııa) +37,5

...25. Vıtalıı Pýhkalo (Qazaqstan) +2:44,8

...40. Evgenıı Velıchko (Qazaqstan) +3:32,5.