Beıjiń-2022: Qazaqstandyq konkıshi sporttan birjola ketetinin aıtty

NUR-SULTAN. QazAqparat - Beıjiń qalasynda ótip jatqan Qysqy Olımpıada oıyndarynda konkımen júgirýden el namysyn qorǵaǵan Denıs Kýzın sportpen birjola qoshtasatyndyǵyn aıtty, dep habarlaıdy QazAqparat.

Ol búgin Beıjiń Olımpıadasynda 1000 metrge júgirýden synǵa túsken bolatyn. Alaıda júldeli oryndarǵa qol jetkize almady.

Jarystan keıin tilshilerge suhbat bergen ol «Jarysqa qatysty eshqandaı pikir aıta almaımyn. Tek Qazaqstan halqynan dostarym men tanystarymnan, búgin maǵan jankúıer bolǵan jandardan keshirim suraımyn. Búgingi jarysta ne bolǵanyn, nelikten mundaı nátıje kórsetkenimdi bilmeımin. Eshteńemen aqtala almaımyn. Tek óte nashar óner kórsetkenimdi bilemin. Ásirese, óz mansabymdaǵy eń sońǵy básekede. Negizi, qysqa qashyqtyqtar boıynsha ótetin álem birinshiliginde aıaqtasam dep oılaǵanmyn. Biraq ózimniń búgingi nátıjemnen soń sporttaǵy ǵumyryma núkte qoıamyn dep sheshtim», - dedi Kýzın jýrnalısterge.

Aıta keteıik, Kýzın 2013 jyly osy sport túrinen álem chempıony atanǵan bolatyn. Bul onyń sporttyq mansabyndaǵy qatysyp otyrǵan tórtinshi Olımpıada oıyndary.