Beıjiń-2022: Qazaq sportshylary búgin qalaı óner kórsetti
Búgin Olımpıada oıyndarynda sporttyń úsh túrinen jarys jolyna 7 sportshymyz shyqty. Alaıda eshqaısysy júldeli orynǵa qol jetkize almady.
Aq Olımpıadaǵa attanǵan Ulttyq qurama músheleri el qorjynyna qashan júlde salary áli belgisiz.
Eń áýeli shańǵy jarysynan áıelder arasyndaǵy (4h5 km) estafetalyq jarystardan kil myqtylar anyqtaldy.
Bul synda el namysyn tórt atletimiz Valerııa Tıýleneva, Ksenııa Shalygına, Angelına Shýryga jáne Nadejda Stepashkına qorǵady.
Nátıjesinde estafetadan Qazaqstan áıelder quramasy jarys qorytyndysy boıynsha 15-shi orynǵa ıe boldy.
Atalǵan dodada bas júldeni Reseı quramasy, kúmisti germanııa quramasy, úzdik úshtikti shvetsııalyqtar qanjyǵasyna aılady.
Odan keıin konkımen júgirý sportynan erler arasynda 500 metrlik qashyqtyqtan júırikter anyqtaldy. Bul synda Qazaqstan atynan Ivan Arjannıkov baq synady.
Nátıjesinde jerlesimiz otandasymyz úzdikter qataryna qosyla alǵan joq.
Ol 500 metr qashyqtyqty 35:82 sekýndta júgirip ótip, 30 sportshydan 28-orynǵa ıe boldy.
Atalǵan qashyqtyqty 34,32 sekýndta júgirip ótken qytaılyq Gao Tınıýı altyn medal ıegeri atandy.
Kúmis júldeni ońtústik koreıalyq (34,39) Cha Mın Kıý qanjyǵasyna baılasa, úzdik úshtikti japonııalyq Vatarý Morıshı (34,49) óz enshisine jazdy.
Qazaqstandyq sportshylardan búgingi jarysty bıatlonshylarymyz qorytyndylady.
Erler arasynda 10 shaqyrymdyq sprıntten ótken saıysta Vladıslav Kıreev pen Aleksandr Mýhın el namysyn qorǵaǵan bolatyn.
Jarys qorytyndysynda Aleksandr Mýhın máre syzyǵyn 49-shy bolyp kesti. Al Vladıslav Kıreev márege 77-shi bolyp jetti.
Bul dodada máre syzyǵyn birinshi bolyp kesken Norvegııa Iohannes Boe (24:00.4 (0+1)) jeńimpaz atandy. Ekinshi oryndy frantsııalyq bıatlonshy Kventın Fııon-Meıle (+25,5 (1)) qanjyǵasyna baılady. Úzdik úshtikti Norvegııanyń taǵy bir ókili Tarıa Be (+38,9 (1)) túıindedi.
Osylaısha búgingi jarys kúninde de Qazaqstan quramasynyń sportshylary jankúıerler kútken úmitti aqtaı alǵan joq.