Beıjiń -2022: Frıstaıl-mogýldan el namysyn qorǵaıtyn sportshylar anyqtaldy

NUR-SULTAN. QazAqparat Beıjińdegi Olımpıada oıyndarynda frıstaıl-mogýldan Qazaqstan namysyn alty sportshy qorǵaıdy. Bul týraly komandanyń bas bapkeri Elena Krýglyhına málim etti, dep habarlaıdy QazAqparat Olympic.kz-ke silteme jasap.

Halyqaralyq shańǵy sporty federatsııasy (FIS) Qazaqstan komandasyna qosymsha kvota bóldi. Nátıjesinde, Olımpıada oıyndarynda Qazaqstan atynan tórt áıel adam jáne eki er adam synǵa túsedi.

Atap aıtar bolsaq, Beıjiń tórinde ıÝlııa Galysheva, Aıaýlym Ámirenova, Olesıa Graýr, Anastasııa Gorodko, Dmıtrıı Reıherd jáne Pavel Kolmakovtyń ónerin tamashalaımyz.

«Bári biz qalaǵandaı bolǵan joq. Biraq bul – sport. Kezdesken qıyndyqtarǵa qaramastan, sportshylar ózderin jaqsy qyrynan kórsetip, qysqy oıynda Qazaqstannyń básekelese alatynyn dáleldedi. Bizde erlerden eki, áıelderden tórt kvota bar.

Azdaǵan qıynshylyqtar kezdeskenin atap óttim. Vıza máselesine baılanysty AQSh-taǵy álem kýbogi kezeńine Anton Bondarev bara almady. Ol lıtsenzııaǵa qol sozym jerden toqtady. Jaraqatyna baılanysty Sergeı Romanov Amerıkaǵa bara alǵan joq, al Olen Tsınn joldamasyz qaldy.

Bizdiń elimizdiń namysyn ıÝlııa Galysheva, Aıaýlym Ámirenova, Olesıa Graýr, Anastasııa Gorodko, Dmıtrıı Reıherd jáne Pavel Kolmakov qorǵaıdy. Bul irikteý óte aýyr ótti, sondyqtan, sportshylardyń barlyǵyn da quttyqtaımyn.

Aıta ketý kerek, sportshylar da, bapkerler quramy da tolyǵymen Óskemen qalasynyń ókilderi. Biz Qazaqstan atyn tanytý úshin bar kúshimizdi salamyz. Qazirgi tańda Olımpıada aldyndaǵy daıyndyqty Shymbulaqta ótkizip jatyrmyz», - dedi bas bapker.