Beıjiń-2022: Ár sportshynyń armany jeńis tuǵyrynan kóriný - Kenjesh Sársekenova
- Kenjesh Sadyqqyzy, bıylǵy jyldyń basty dodasy «Beıjiń-2022» olımpıadasynyń bastalýyna sanaýly kúnder qaldy. Konkımen júgirý sportynan Qazaqstan Respýblıkasynyń memlekettik jattyqtyrýshysy retinde shákirtterińizden qandaı júlde kútesiz ?
- Konkımen júgirý sportynan elimizdiń namysyn 5 sportshy qorǵaıdy. Olardyń kimder ekenin ózderińiz jaqsy bilesizder. Árıne, Olımpıadaǵa qatysqan ár sportshynyń armany jeńis tuǵyrynan kóriný. Bizdiń úmitimiz olardy sol bıikten kórý. Sondaqtan ár sportshy óziniń jaýapkershiligin jaqsy túsinedi. Júldeli oryndar úshin bar kúsh-jigerin salady dep senemin. Barlyq sportshylardan júlde kútemiz.
- Ózińiz bilesiz jańa jyl óte sala elimizde jappaı tártipsizdikter oryn aldy. Bul «qańtar oqıǵasy» sportshylarymyzdyń daıyndyǵyna keri áserin tıgizgen joq pa ?
- Olımpıada oıyndaryna daıyndyq elordamyzdaǵy «Alaý» muz aıdynynda ótýde. Qurama komandanyń bas bapkeri Dmıtrıı Babenkonyń jospary boıynsha ótip jatyr. Elimizde bolǵan «tártipsizdikter» bizdiń sportshylarymyzdyń Olımpıadaǵa daıyndalýyna, jattyǵý jasaýyna, ýaqytyly demalýyna eshqandaı keri áserin tıgizgen joq.
- Qysqy Olımpıada oıyndaryndaǵy jetistikterimizge kóp jaǵdaıda jankúıerlerimizdiń kóńili tolmaı jatady. Elmizde jalpy qysqy sport túrleriniń damýyna qandaı baǵa beresiz ?
- Elimizde qysqy sport túrleriniń damý barysy, árıne jazǵy sport túrlerine qaraǵanda kenjelep keledi. Mysaly, kezinde ózim aınalysqan konkımen júgirý sporty týraly aıtar bolsam, sporttyń bul túri de qatty damyp ketken joq. Oǵan basty sebep - sportshylar jattyǵý jasaıtyn, sporttyq bazanyń azdyǵy. Bizge elimizdiń ár óńirinde zamanaýı jabyq muz alańy kerek. Egerde, óńirlerdiń bas qalalarynda jabyq muz alanyń salmasaq, bul sporttyń damýy kesheýildeı beredi. Memleket osy jaǵyna kóńil bólse dep oılaımyn. Qazir de quramada kóptegen talantty sportshylarymyz jeterlik. Sol sportshylarymyzdy baǵalap, saqtaı bilsek, sondaı-aq, bolashaq chempıondardy shyǵarýǵa kúni búginnen bastap kirissek sportty damytýǵa bolady.
- Aldaǵy Olımpıada da kimderge úmit artasyz ?
- Ár sportshy jeńisten úmitti. Sondyqtan eshkimdi bóle jarmaı barlyǵynan úmit kútemin. Barlyq olımpıadashylarǵa tek sáttilik serik bolsyn dep tileımin. Baıraǵymyzdy jelbiretip baryp, jelbiretip otanymyzǵa oralýǵa násip etsin. «Alǵa Qazaqstan!», «Alǵa qazaq sportshylary» degen tilegimdi jetkizgim keledi.
Kenjesh Sársekenova:
1972 jyly týǵan. Jasóspirim qyzdar arasyndaǵy Qazaqstannyń, Álemniń eki márte chempıony, 1994 jyly Lıllehammerde (Norvegııa), 1994 jyly Nagano (Japonııa) qysqy Olımpııa oıyndaryna qatysýshy, qysqy Azııa oıyndaryna (1999, Ońtústik Koreıa) qatysyp, 1500 m-ge syrǵanaýdan 8-shi, kópsaıysta 9-shy orynǵa ıe bolǵan. Álem kýbogynyń kezeńderine, Norvegııa, Gollandııa, Germanııada ótken halyqaralyq týrnırlerge qatysqan. Konkıde júgirýden sport sheberi, eki dúrkin qysqy Olımpıada qatysýshysy, 7 dúrkin QR chempıony.
Sýret: el.kz