Beıtanys qyzǵa búıregin tegin bergen Abzal shańyraq kóterdi

ALMATY. QazAqparat - Beıtanys qyzǵa búıregin tegin bergen oraldyq jigit Abzal Ádilov shańyraq kóterdi. Qaıyrymdy jigit bolashaq jaryn Túrkistan oblysynan tapty, dep habarlaıdy QazAqparat tilshisi.

Bir búıregin tanymaıtyn qyzǵa tegin bergen Abzal Ádilov 2017 jyldan beri áleýmettik jelide tanymal bolyp ketti.

Qarapaıym otbasydan shyqqan oraldyq jigit Túrkistan oblysynyń turǵyny Jámıla Baıserikovanyń basyndaǵy qıyn jaǵdaıdy estip, kómek qolyn sozýǵa bel býady. Jigit naýqastan aqsha suramaı, bir búıregin berýge kelisedi.
Jámıla men Abzal 2017 jyldyń qarashasynda búırek aýystyrý úshin otaǵa túsken edi. Birneshe saǵatqa sozylǵan operatsııa sátti ótken. 5 kúnnen soń Abzal men Jámıla jáne Jámılanyń anasy Qurmangúl Shymkentke ketken bolatyn.

Jas jigit óziniń mahabbatyn Shymkentte júrip jolyqtyrǵan eken.

«Shymkentte júrgende áleýmettik jeli arqyly Áıgerim degen qyzben tanystym. Ol ózi meniń oqıǵamdy estip bilgen soń maǵan jazǵan. 1-2 aptadaı sóılesip, kezdesip júrdik. Keıin bir-birimizdi unatyp qaldyq. Men Áıgerimdi Oral jaqqa alyp kettim. Ata-anam kelin apara jatqanymdy estigende senbedi. Jarym Áıgerim Ordabasy aýdany, Temirlan aýylynyń qyzy», - dedi Abzal Ádilov.

Qazir jas otbasy Oralda turyp jatyr. Aıgerim - balabaqshada tárbıeshiniń kómekshisi bolyp jumys isteıdi. Abzal «KVANT» JShS-da qyzmet etedi.

Shildeniń 8-inde Abzal men Áıgerimniń toıy josparlanǵan.  Abzal qýanysh toıyna Jámıla men onyń anasyn da shaqyrǵan.

Alaıda, densaýlyǵynyń álsizdigine baılanysty Jámıla men anasy toıǵa kele almaıtyn bolypty.