Beıtanys jigitti pyshaqtap óltirgen aqtóbelik 15 jylǵa bos bostandyǵynan aıyryldy

<p>AQTÓBE. KAZINFORM - Aqtóbede tóbeles kezinde beıtanys adamǵa eki ret pyshaq suǵyp óltirgen sottalýshyǵa úkim shyqty. Ol 15 jylǵa bas bostandyǵynan aıyryldy jáne 11,7 mln teńge materıaldyq jáne moraldyq shyǵyndy óteıdi.</p>

Aqtóbe oblystyq qylmystyq ister jónindegi mamandandyrylǵan aýdanaralyq sotynda Qylmystyq kodekstiń «Kisi óltirý», Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» baptary boıynsha is qaraldy. Іs materıalyna súıensek, byltyr shilde aıynda qaladaǵy dámhanalardyń birinde qyzdar urysyp, janjaldasyp qalady. Sottalýshy ózi tanıtyn jáne beıtanys adamdar arasyndaǵy urys-keriske kıligip, kúsh qoldanbaq bolady. Sol kezde jaqyn mańdaǵy oryndyqta otyrǵan jábirlenýshi onyń ashýǵa býlyqqanyn kórip, aradaǵy kelispeýshilikti sheshý úshin kópqabatty úıge qaraı ertip ketedi. Onyń bul áreketine ashýlanǵan sottalýshy jınalmaly pyshaq shyǵaryp, eki ret suǵyp alady. Sol kezde pyshaq qyry jábirlenýshiniń kúretamyryn kesip, ol jedel járdem kóliginiń ishinde qansyrap óledi. Sottalýshyny tintý kezinde odan esirtki tabyldy.

- Sottalýshy sotta óz kinásin moıyndamady. Ol adam óltirý oıynda bolmaǵanyn, kerisinshe qorǵanǵanyn aıtty. Bul isi úshin ókinip, jábirlenýshi taraptan keshirim surady. Al esirtki zatyn dámhanaǵa keler aldynda taksı ishinen taýyp aldym dep túsindirdi. Prokýror 15 jyl bas bostandyǵynan aıyrýdy surady. Sot úkimimen sottalýshy 15 jylǵa bas bostandyǵynan aıyryldy. Sot jábirlenýshi tarapqa 11,7 mln teńge materıaldyq jáne moraldyq shyǵyn óndirýdi mindettedi,- dep habarlady oblystyq qylmystyq ister jónindegi mamandandyrylǵan aýdanaralyq sotynyń baspasóz qyzmeti.

Sot úkimi zańdy kúshine engen joq.