Beısen Quranbek atyndaǵy «Jiger» syılyǵyna ótinimder qabyldaý bastaldy
«Jiger» syılyǵyna ótinimderdi qabyldaý 2021 jyly 20 tamyzdan 20 qyrkúıekke deıin «Medıa damytý qory» korporatıvtik qorynyń mdq.kz resmı saıtynda júzege asyrylady.
«Jiger» - jýrnalıstik sheberlik salasynda áleýmettik mańyzy bar taqyryptardy jarııalaǵany úshin beriletin kásibı syılyq.
Syılyqtyń negizgi maqsaty – talantty jýrnalıst, qoǵam qaıratkeri, Qazaqstan Respýblıkasy Prezıdenti syılyǵynyń laýreaty Beısen Quranbektiń esimin el jadynda óshirmeý, murasyn saqtap qalý. Beldi jýrnalıst qazaqstandyq televızııanyń damýyna úlken úles qosyp, eńbeksúıgishtigi men kásibine qaltqysyz qyzmet etýiniń arqasynda áriptesteri men telekórermenderiniń yqylasyna bólendi.
Konkýrsqa qatysý sharttary:
- Konkýrsqa Qazaqstan Respýblıkasynyń Respýblıkalyq jáne oblystyq telebaǵdarlamalary qatysa alady;
- Konkýrsqa usynylǵan materıaldar teleefırde 2021 jyldyń 1 qańtary men 19 qyrkúıek aralyǵynda kórsetilýi tıis;
- Konkýrsqa qazaq jáne orys tilderindegi jumystar qabyldanady;
- Konkýrsqa qoǵam úshin ózekti máselelerdi jáne áleýmettik taqyrypty qozǵaıtyn telebaǵdarlamalar qatysa alady.
Marapat Beısen Quranbektiń jýrnalıstik qyzmettegi prıntsıpterin barynsha tolyq kórsete bilgen jumystarǵa beriledi. Quramyna medıasala mamandary jáne Beısen Quranbektiń úzeńgiles dostary enetin qazylar alqasynyń músheleri daýys berý qorytyndysy boıynsha jeńimpazdardy anyqtaıtyn bolady.
Baıqaý jeńimpazdary «Jiger» estelik músinshesiniń, dıplomnyń jáne qarjylaı syılyqtyń ıegeri atanady.
I oryn úshin - 1 000 000 teńge, II oryn úshin - 500 000 teńge jáne III oryn úshin - 300 000 teńge.
Baıqaý qorytyndysy men jeńimpazdar esimderi 2021 jyldyń 27 qyrkúıeginde belgili bolady.
«Jiger» syılyǵy alǵash ret 2020 jyly QR Aqparat jáne qoǵamdyq damý mınıstrligimen «Medıa damytý qory» korporatıvtik qorymen yntymaqtastyqta quryldy. Syılyqqa otandyq BAQ-tyń 4 ókili ıe boldy.