Beıpartııalyq saılaýdy baıqaý ortalyǵy aýmaqtyq saılaý komıssııalarymen kezdesti
Bıylǵy Májilis depýtattarynyń saılaýy Saılaý zańnamasynyń jańa túzetýlerine sáıkes ótedi. Osy rette Qostanaı oblysynyń beıpartııalyq baıqaý ortalyǵy baıqaýshylardy sapaly daıarlaýǵa erekshe basymdyq berip otyr. Sonymen qatar shtab zańdyq turǵyda adal saılaý ótkizý monıtorıngin uıymdastyrady.
«Biz zańnamanyń buzý faktilerin anyqtap qana qoımaı, olardyń aldyn alýyna mán beremiz. Sol sebepti oblystyq jáne qalalyq saılaý komıssııalarynyń basshylarymen kezdesýler ótkizdik. 2021 jyldyń 10 qańtaryndaǵy Parlament saılaýy jańasha ótedi. Birinshiden, 16 jylda alǵash ret parlamenttik saılaý merziminen buryn ótpeıdi. Ekinshiden, koronavırýstyq pandemııa jaǵdaıynda ózgeshe bolmaq. Qazir daýys berýge qajetti qural-jabdyqtardyń barlyǵy ornalastyrylǵan. Saılaýshylarǵa da, baıqaýshylarǵa da qajetti jaǵdaı jasalǵan. Sanıtarlyq sharalar tolyq saqtalǵan. Oblys boıynsha 700-den astam táýelsiz baıqaýshy daıyndalýda. Olar úshin saılaýdy obektıvti baǵalaý negizgi qaǵıdat bolady», - deıdi Bolat Qalıev.
Beıpartııalyq baıqaý shtaby kezdesý barysynda saılaý kezindegi ashyqtyq pen jarııalylyqty qamtamasyz etý jóninde aýqymdy túsindirme jumystaryn júrgizdi. Bolat Qalıev aıtqandaı, bul joly saılaýǵa baıqaýshy retinde burynǵydaı kez kelgen nıetti qoǵamdyq uıymdar emes, jarǵysynda saılaýdy baıqaý maqsaty bar arnaıy uıymdar qatysady. Bul talapqa saı kelse de baıqaýshy-ókildi saılaý ýchaskesinde tirkeý úshin endi jeke basyn kýálandyratyn qujattan basqa baıqaýshynyń kýáligi, jarǵy kóshirmesi, sondaı-aq qoǵamdyq birlestik basshysynyń ókilettigin kýálandyratyn qujat talap etiledi.