Beıpartııalyq baıqaýshylardyń bári shtatty rejımde jumys júrgizýde

NUR-SULTAN. QazAqparat – Beıpartııalyq saılaýdy baıqaý ortalyǵynyń jetekshisi, Qazaqstan Azamattyq alıansynyń prezıdenti Baný Nurǵazıeva saılaý ýchaskelerinde tirkelgen zańbuzýshylyqtar týraly aıtyp berdi, dep habarlaıdy QazAqparat tilshisi.

«Saılaýdy beıpartııalyq baıqaý ortalyǵyna kelip jatqan aqparat boıynsha, bizdiń baıqaýshylar málimet berip jatyr. Sol málimet boıynsha bir-eki aýyz sóz zańbuzýshylyqtar týraly aıtyp óteıin. Kezdesken sondaı jaǵdaılar bar. Máselen, Shymkent qalasynda №130 saılaý ýchaskesinde bir jaǵdaı tirkeldi. «El daýysy» qoǵamdyq uıymynyń baıqaýshysy Ýálıhan Turarbek óz uıymynyń baıqaýshylaryna kedergi keltirilip jatqany týraly Feısbýkte jazǵan. Osy aqparattyń izimen ózimizdiń sol ýchaskedegi Gúlmıra Saparova atty baıqaýshyǵa shyqtyq», - deıdi Baný Nurǵazıeva Saılaýdy beıpartııalyq baıqaý ortalyǵynda tilshilerdiń suraǵyna jaýap bere otyryp.

Onyń aıtýynsha №130 saılaý ýchaskesinde «El daýysy» uıymynyń baıqaýshysy Dúısenbekova Jansaıa Nurǵalıqyzy tańerteńnen beri esh kedergisiz, typ-tynysh jumysyn jasap jatqany anyqtalǵan.

«Feısbýkte jazylǵan osy aqparat jalǵan bolyp otyr. Ekinshiden, Saılaýdy beıpartııalyq baıqaý ortalyǵynyń Shyǵys Qazaqstandaǵy basshysy bir baıqaýshynyń saılaý ýchaskesinde translıatsııa berip, basqalaryna kedergi keltirip jatqanyn aıtty. Otyrǵan basqa baıqaýshylar birigip, akt jasap, sol arqyly kedergi jasap jatqan baıqaýshy ýchaskeden shyǵaryldy», - dedi ol.