Beıpartııalyq baıqaýshylar tarapynan eshqandaı buzýshylyq bolǵan joq - Baný Nurǵazıeva
«Saılaýdy beıpartııalyq baıqaý ortalyǵy tuńǵysh ret qoǵamdyq ınstıtýt retinde qurylyp, saılaý protsesin baqylaýdyń ahýaldyq ortalyǵy retinde qyzmet etti. Bizdiń ortalyq alańynda ártúrli resýrstar: Qazaqstannyń Azamattyq Alıansy, QR Kásipodaqtar Federatsııasy jáne 130-dan astam úkimettik emes uıymdar biriktirildi. Jalpy, bizdiń baıqaýshylardyń pikiri boıynsha: baıqaýshylarymyz ózderiniń kásibı sheberligin, jaýapkershiligin, biliktiligin kórsetti. Eń bastysy beıpartııalyq baıqaýshylar tarapynan eshqandaı buzýshylyq bolǵan joq. Olardyń barlyǵy saılaý ýchaskelerine aldyn-ala kelip, óz oryndaryna jaıǵasty. Saılaý protsesine qatysýshynyń árqaısysy óziniń quzyrettiligi men kásibıligin kórsetti», - deıdi Baný Nurǵazıeva.
Onyń aıtýynsha, epıdemıologııalyq jaǵdaıǵa qaramastan saılaýǵa qatysýshylar sany kóp boldy.
«Jalpy alǵanda, Beıpartııalyq baıqaý ortalyǵy zańmen bekitilgen 11 buzýshylyqty tirkedi. olardyń basym bóligi taza tehnıkalyq sıpatta bolǵanyn jáne jergilikti jerlerdegi saılaý komıssııalarynyń múshelerimen jedel joıylǵanyn atap ótken jón», - deıdi ol.
Beıpartııalyq baıqaý ortalyǵynyń basshysy keltirgen mysaldarǵa keletin bolsaq, Petropavlda saılaý ýchaskesinen fotosýretter men beınejazbalardy efırge shyǵarǵany úshin baıqaýshylardyń biri saılaý ýchaskesinen shyǵaryldy, sebebi olaı etýge zańmen tyıym salynǵan. Mańǵystaý oblysy, Jańaózen qalasynda masań kúıdegi azamat daýys ber paraǵyn jáshikke salǵannan keıin jáshikti syndyryp tastaǵan.
«Shymkentte saılaýǵa qatysýshy daýys beretin jáshikti shatastyryp, daýys beretin jáshiktiń qasynda turǵan basqa jáshikke salyp qoıǵan. Aqtóbede saýlaý protsesin vıdeoǵa túsirip, áleýmettik jelige salǵan. Bulaı etýge zańmen tyıym salynady. Keıbir azamat saılaý ýchaskesine ózderin saılaý komıssııasy múshesi nemese baıqaýshy retinde tanystyryp kirgen. Sóıte tura qujattaryn kórsetýden bas tartyp, saılaý ýchaskesine kirip ketkileri kelgen. Oralda bir baıqaýshy saılaý komıssııasyna agressııa kórsetkeni úshin saılaý ýchaskesinen shyǵarylǵan. PTR test nátıjesi bolmaǵandyqtan keıbir baıqaýshylar saılaý ýchaskesine kirgizilmegen», - deıdi Baný Nurǵazıeva.
Sondaı-aq, ol saılaý protsesine qatysqandarǵa alǵys aıtty.
«Saılaý protsesiniń monıtorıngine qatysqan barlyq beıpartııalyq baıqaýshylarǵa daýys berý rásimin baqylaý máselelerindegi joǵary azamattyq jaýapkershiligi men quzyrettiligi úshin shyn júrekten alǵysymdy bildirgim keledi», - deıdi ol.