Beıbit Juqaev Shanhaıda kambek jasap, ekinshi aınalymǵa ótti

<p>ASTANA. KAZINFORM — Qazaqstandyq tennısshi, álemniń 218-raketkasy Beıbit Juqaev Shanhaı (Qytaı) chellendjer týrnırin sátti bastady.</p>

Qazaqstandyq tennısshi alǵashqy aınalymda dúnıejúzilik reıtıngide 510-orynda turǵan jańazelandııalyq Adjıt Raıdy joldan taıdyrdy.

Birinshi partııada Raı basymdylyq tanytty — 6:2. Sodan keıin Juqaev oıyn tizginin qolyna ala bildi — 6:3, 7:6 (7:3).

Eki saǵat 8 mınýtqa sozylǵan báseke barysynda Beıbit 5 eıspen birge 7 breık-poınttyń bireýin ǵana paıdalandy. Raı 4 eıs, 2 breıkpen (4 breık-poınt) kózge tústi. 

Beıbit Juqaev shırek fınalǵa shyǵý úshin álemniń 160-raketkasy, Chılı ókili Tomas Barrıospen talasady. 

Shanhaı dodasy 8 qyrkúıekte máresine jetedi. 

Qazaqstandyq, álemniń 181-raketkasy Dmıtrıı Popko Genýıa (Italııa) chellendjer jarysynyń alǵashqy aınalymynan asa almady. Ol tartysty oıynda reıtıngide 127-satydaǵy kolýmbııalyq Danıel Elahı Galanǵa jol berdi — 5:7, 7:5, 3:6.

Sonymen qatar Ystanbuldaǵy (Túrkııa) dál osyndaı týrnır Mıhaıl Kýkýshkın men Denıs Evseev úshin sátsiz boldy. Álemniń 117-raketkasy M.Kýkýshkın reıtıngide 322-oryndaǵy belgııalyq Mıkael Gırttske ese jiberdi — 6:4, 3:6, 5:7.

Álemniń 207-raketkasy D. Evseev reıtıngide ózinen 19 saty tómen turǵan nıderlandylyq Gııs Brývermen oıynda esep 4:6, 1:2 bolǵan mezette matchty jalǵastyrýdan bas tartty.

Eske sala keteıik, budan buryn tennısten Danııamen oınaıtyn Qazaqstan quramasy anyqtalǵanyn jazǵan bolatynbyz.