Beıbit Juqaev Meksıkadaǵy jarystyń shırek fınalyna ótti

<p>ASTANA. KAZINFORM &mdash; Qazaqstandyq, álemniń 192-raketkasy Beıbit Juqaev Morelos (Meksıka) chellendjer týrnıriniń shırek fınalyna ótti.</p>

Jarystyń 8-raketkasy B.Juqaev ekinshi aınalymda dúnıejúzilik reıtıngide 430-satyda turǵan amerıkalyq Krıstıan Langmodan aılasyn asyrdy.

Qazaqstandyq sportshy birinshi partııada esep 4:3 bolǵan mezette breık jasaı aldy – 6:3.
Ekinshi sette taı-breıkte Beıbit óz múmkindigin múlt jibergen joq – 7:6 (7:5).

Bir saǵat 20 mınýtqa sozylǵan báseke barysynda Juqaev 8 eıspen birge 3 breık-poınttyń ekeýin óz esebine jazdy. Langmo 13 eıs jasap, 3 breık-poınttyń bireýin paıdalandy.

Beıbit Juqaev jartylaı fınalǵa shyǵý úshin álemniń 135-raketkasy, aýstralııalyq Adam Ýoltonmen sheberlik talastyrady. Ol reıtıngide 327-oryndaǵy shveıtsarııalyq Antýan Beleni utty - 7:6 (13:11), 6:4.

Qazaqstandyq tennısshi ATP Live reıtıngisinde 185-orynǵa kóterilip tur. Beıbittiń buǵan deıingi úzdik kórsetkishi 186-saty edi. 

Eske sala keteıik, budan buryn 18 jastaǵy qazaqstandyq tennısshiniń Túrkııadaǵy týrnırdiń 1-raketkasyn jeńgenin jazǵan bolatynbyz. 

Sondaı-aq Mıhaıl Kýkýshkın Madrıd týrnıriniń shırek fınalyna joldama aldy.