Beıbit Juqaev Meksıkadaǵy jarysty jeńispen bastady

<p>ASTANA. KAZINFORM &mdash; Qazaqstandyq, álemniń 192-raketkasy Beıbit Juqaev Moroles (Meksıka) chellendjer jarysyn jeńispen bastady.</p>

Týrnırdiń 8-raketkasy bolyp tirkelgen qazaqstandyq tennısshi alǵashqy aınalymda dúnıejúzilik reıtıngide 359-orynda turǵan Zımbabve ókili Bendjamın Lokpen kortqa shyqty.

Osyǵan deıin 3 sáýir kúni Beıbit Mehıko dodasynda Lokty 4:6, 6:3, 6:4 esebimen utqan edi.

Bul joly tartysty órbigen birinshi partııada Juqaev taı-breıkte sátti oınady – 7:6 (8:6).

Ekinshi sette qazaqstandyq tennısshi 3:0 esebimen alǵa ketti. Aqyry taǵy bir breıkke qol jetkizip, matchty jeńispen túıindedi – 6:2.

Bir saǵat 39 mınýtqa sozylǵan matchta Beıbit 11 eıspen birge 6 breık-poınttyń ekeýin múlt jibergen joq. Lok 8 eıspen ǵana shekteldi.

Beıbit Juqaev shırek fınalǵa shyǵý úshin álemniń 430-raketkasy, amerıkalyq Krıstıan Langmo nemese reıtıngide 1083-satydaǵy meksıkalyq Aleks Ernandestiń qaı jeńgenimen talasady.

Eske sala keteıik, budan buryn tennısten Madrıd týrnırinde Mıhaıl Kýkýshkınniń ekinshi aınalymǵa shyqqanyn jazǵan bolatynbyz.

Dmıtrıı Popko AQSh-taǵy týrnırde jarystyń birinshi raketkasyn utty.