Beıbit Álibekov pen Nurlan Qoıanbaev depýtat bolýy múmkin be

<p>ASTANA. KAZINFORM &ndash; Májilis depýtaty, &laquo;Respublica&raquo; partııasynyń kóshbasshysy Aıdarbek Qojanazarov Dınara Shúkijanovanyń ókilettigin tapsyrýy týraly pikir bildirip, ornyna kim keletini jóninde aıtty.</p>

«Bizde de basqalar sııaqty partııalyq tizim bar. Ortalyq keńespen jınalýdy josparlap otyrmyz, bir aptada kelesi depýtatty anyqtaýymyz kerek. Árıne, úmitkerler bar. Biraq Beıbit Álibekov pen Nurlan Qoıanbaevtyń Parlamentke kelýi ekitalaı. Basqa jigitter bar. Ázirge esh favorıtimiz joq, bárimiz daýys beremiz. Dınara Shúkijanova múshe bolǵan komıtetke saı keletin, kásipkerlik tájirıbesi bar birqatar adam bar. Shynymdy aıtsam, qazir pikir aıtý qıyn, óıtkeni árqaısymyzdyń óz oıymyz bar. Endi osy oılardyń bárin ortaǵa salamyz. Dınaranyń ózi partııamyzda teń tóraǵa bolyp qala beredi. Onyń da usynystary bar shyǵar», - dep jaýap berdi A. Qojanazarov Májilis kýlýarynda.

Onyń aıtýynsha, Dınara Shúkijanova kópten beri bızneske qaıta oralǵysy keletinin aıtyp júrgen. Biraq ol bastaǵan bastamalaryn aıaqtaýy kerek edi.

«Qazir barlyq bastamalaryn tabysty aıaqtady, sondyqtan bızneske ketip jatyr. Menimen janjaldasyp ketti degen sóz – qaýeset. Ol meniń jaqyn dosym, «Respublica» partııasy qurylmaı turyp-aq dos boǵlanbyz. Partııada kóshbasshylyq úshin kúres bolǵan joq. Aınalyp kelgende, onyń qalaýy ónerkásipte jumys isteý boldy. Joq, ol Qarmetke barmaıdy, Qostanaıǵa, ózi jumys istegen kásiporynǵa oralady. Eshkim Májilisten túńilgen joq. Dınara, kerisinshe, óte úlken tájirıbe alǵanyn aıtýda. Eń bastysy, ol Parlament paraǵyn túbegeıli japqan joq. Bolashaqta bul taqyrypqa qaıta oralýy múmkin», - dedi partııa basshysy.

Aıta keteıik, búgin Parlament Májilisiniń jalpy otyrysynda depýtat Dınara Shúkijanovanyń ókilettigi merziminen buryn toqtatyldy.