Beıbitshilik pen kelisimdi qorǵaı otyryp, egemendik baǵytymyzdy ustanýymyz kerek - Prezıdent

ASTANA. QazAqparat – Buryn-sońdy bolmaǵan geosaıası shıelenis pen jahandyq ekonomıkadaǵy daǵdarys kezinde elimiz óziniń joǵary damý dınamıkasyn saqtaýy kerek. Bul týraly Memleket basshysy Qasym-Jomart Toqaev Pavlodar oblysy jurtshylyǵymen kezdesýinde aıtty, dep habarlaıdy QazAqparat tilshisi.

«Uly dala tórinde qonaqjaılyqpen jáne ózara qoldaý kýltimen úılesetin erkindik pen shyǵarmashylyq rýhy árdaıym baǵalanyp kelgen. Qazaqstan túrli órkenıetter toǵysyp, baıı túsetin orynǵa aınaldy. Sondyqtan, «áralýandyq birligi» qaǵıdaty elimizdiń qoǵamdyq damýyna negiz bolyp otyr. Jaqynda Rım Papasy Qazaqstan týraly, ózara toleranttyq, dostyq jáne elimizdiń beıbitshilik pen yntymaqtastyqqa umtylysy týraly óte jyly lebizin aıtty», - dedi Prezıdent.

Óz sózinde Memleket basshysy aryqaraı demokratııalandyrý úshin prezıdenttik ınstıtýtty reformalaýǵa bastamashy bolǵanyn eske saldy. Onda Memleket basshysynyń ókilettigi bir ret saılaný quqyǵymen jeti jyldyq merzimge shektelgen. Bul konstıtýtsııalyq normany qabyldaý azamattar arasynda zor qoldaýǵa ıe boldy.

«Buryn-sońdy bolmaǵan geosaıası shıelenis pen jahandyq ekonomıkadaǵy daǵdarys qubylystarynyń ósýi kezinde elimiz óziniń joǵary damý dınamıkasyn saqtaýy kerek. Bizdiń tabysymyzdyń kepili – jalpyulttyq birlik pen jalpyazamattyq yntymaqtastyq. Biz ózimizdiń basty baılyǵymyz – beıbitshilik pen kelisimdi qorǵaı otyryp, egemendik baǵytymyzdy naqty ustanýymyz kerek», - dedi Q. Toqaev.

Foto:t.me/bort_01