Beıbit jıyndardy kelisý protsedýrasyn jeńildetetin zań qabyldanady -Dáýren Abaev
Bul týraly búgin QR Aqparat jáne qoǵamdyq damý mınıstrliginiń keńeıtilgen alqa otyrysynda vedomstvo basshysy Dáýren Abaev aıtty, dep habarlaıdy QazAqparat tilshisi.
«Búginde elimizde azamattyq qoǵammen ózara is-qımyldyń tıimdi júıesi qurylǵan. Degenmen, el basshylyǵy ony odan ary josparly damytý úshin kelesi mindetterdi júktep otyr. Birinshiden, 2025 jylǵa deıin azamattyq qoǵamdy damytý tujyrymdamasy qabyldanady. Qujat kommertsııalyq emes uıymdardy qurý protsedýrasyn jeńildetýge baǵyttalady. Úkimettik emes uıymdardy memlekettik qoldaý, onyń ishinde memlekettik qarjylandyrý júıesiniń ashyqtyǵyn qamtamasyz etý arqyly qoldaý tetikterin damytý qarastyrylatyn bolady. Azamattyq qoǵamdy zańnamalyq bastamalardy talqylaý protsesine munan ary da jumyldyrý josparlanǵan», - dedi mınıstr.
Onyń atap ótýinshe, ekinshiden, úkimettik emes uıymdardy qoldaý resýrstyq ortalyqtarynyń jumysy kúsheıtiledi. Anyqtalǵan úkimettik emes uıymdardyń tizilimi jasaqtalady.
«Bul qujattyń mańyzdylyǵyn baǵalaý qıyn. Sondyqtan ol barlyq múddeli taraptarmen, ásirese úkimettik emes sektormen sapaly ázirlenýi tıis. Osyǵan qaraı vıtse-mınıstr D.Esınge tujyrymdamanyń 2020 jyldyń shildesinen keshiktirilmeı bekitilýin qamtamasyz etýdi tapsyramyn», - dedi ol.
Sonymen qatar ol osy jyldyń aqpanynda elimizdiń Táýelsizdiginiń 30 jyldyq mereıtoıyn merekeleý tujyrymdamasyn jáne is-sharalar josparyn bekitý qajettigin atap ótti.
«Úshinshiden, qoǵamdyq keńester týraly zańnamaǵa ózgertýler engizý qajet. Tórtinshiden, «Qazaqstan Respýblıkasynda beıbit jıyndardy uıymdastyrý jáne ótkizý tártibi týraly« zańnyń qabyldanýyn qamtamasyz etý kerek. Ol beıbit jıyndardy kelisý protsedýrasyn jeńildetýge baǵyttalatyn bolady», - dedi Dáýren Abaev.